اسلام آباد (مانیٹرنگ ڈیسک ،این این آئی)لاہور ہائیکورٹ کے فیصلے کے بعد ن لیگ کی صفوں میں کھلبلی مچ گئی ہے ،حکومتی جماعت نے سر جوڑ لئے ، دوسری جانب عوامی نیشنل پارٹی (اے این پی) نے بھی وفاقی حکومتی اتحاد سے علیحدگی پر غور شروع کر دیا۔
نجی ٹی وی کے مطابق ذرائع نے بتایاکہ وفاقی دارالحکومت اسلام آباد میں ایمل ولی خان کی زیرِ صدارت اے این پی کی مرکزی قیادت کا اجلاس منعقد ہوا۔ذرائع نے بتایا کہ اجلاس میں حکومتی اتحاد کے لیے کیے گئے وعدوں اور ان پر عمل درآمد سے متعلق تبادلہ خیال کیا گیا۔اجلاس میں اے این پی رہنمائوں نے حکومتی اتحاد سے علیحدگی کی تجویز دے دی۔اس حوالے سے ایمل ولی خان نے حتمی فیصلوں کے لیے مرکزی قیادت کا اجلاس عیدالاضحیٰ کے بعد طلب کر لیا۔ذرائع کا کہنا ہے کہ اے این پی رہنمائوں نے حکومتی اتحاد سے علیحدگی کا اختیار پارٹی سربراہ کو دے دیا ہے۔اے این پی کے ذرائع کا کہنا ہے کہ قیادت کو شکایت ہے کہ حکومت کی جانب سے کیا گیا کوئی وعدہ پورا نہ ہو سکا۔اے این پی قیادت کو یہ شکایت بھی ہے کہ کسی بھی حکومتی فیصلے پر انہیں اعتماد میں نہیں لیا گیا۔ذرائع کے مطابق دیگر اتحادی جماعتوں کو بھی حکومت سے شدید تحفظات ہیں ۔
