نئی دہلی(این این آئی) بھارت میں تفتیشی افسران نے پنجابی گلوکار سدھو موسے والا کے قتل کی گتھی ایک رسید کی مدد سے سلجھاتے ہوئے مرکزی ملزمان سمیت 10افراد کو گرفتار کرلیا۔

میڈیا رپورٹ کے مطابق پولیس نے گلوکار کے قتل میں استعمال ہونے والی ایک کار سے ملنے والی رسید سے قتل کے منصوبہ ساز گینگسٹر لارنس بشنوئی سمیت 10ملزمان کو گرفتار کیا جبکہ اس جرم میں ملوث 4شوٹروں کی بھی شناخت کرلی۔ پولیس نے بتایا کہ قتل کی واردات میں استعمال ہونیوالی کار میں سے ایندھن کی رسید( تاریخ 25مئی 2022)ملی جس کے باعث ملزمان تک پہنچنے میں آسانی ہوئی، مذکورہ کار کو وقوعہ سے 13کلومیٹر دور چھوڑ دیا گیا تھا۔پولیس کی ایک ٹیم فوری طور پر فتح آباد کے پیٹرول پمپ پرپہنچی جہاں سے پیٹرول بھروایا گیا تھا، پیٹرول کے سی سی ٹی وی فوٹیج سے سونی پت کے ایک شخص پریاورت کی شناخت کی جو ممکنہ طور پر ایک شوٹر تھا۔بعد ازاں پولیس نے جرم میں استعمال ہونے والی تمام گاڑیوں کا بھی پتا لگایا۔ پولیس نے قتل کے منصوبہ ساز سمیت علاقائی سطح پر تعاون فراہم کرنے والے تمام افراد کو بھی گرفتار کرلیا۔