نئی دہلی(این این آئی) بھارت میں نبی کریم ۖ کی شان اقدس میں گستاخی کیخلاف احتجاج کرنے والے مسلمانوں پرپولیس نے بدترین تشدد کیا۔بھارتی شہرکان پور میں نبی کریم ۖ کی شان اقدس میں گستاخی کیخلاف احتجاج کرنے والے مسلمانوں پرانتہاپسند پولیس ٹوٹ پڑی۔

مسلمان نوجوانوں کوبدترین تشدد کا نشانہ بنایا اورمتعدد کوگرفتارکرلیا۔سوشل میڈیا پروائرل ویڈیو میں دیکھا جا سکتا ہے کہ متعدد پولیس اہلکارمسلمان نوجوان پرتشدد کررہے ہیں اور گھیسٹتے ہوئے لے کرجارہے ہیں۔ نوجوان کوبچانے کے لئے آںے والی خواتین سے بھی پولیس والوں نے بدتمیزی کی اور دھکے دئیے۔بھارت کی ہندو انتہاپسند حکمران جماعت بی جے پی کے ارکان مسلمانوں کے خلاف مسلسل اشتعال انگیز اورنفرت پرمبنی بیانات دے رہے ہیں۔دوسری جانب انڈین نیشنل کانگریس نے کہا ہے کہ برسراقتدار بی جے پی اور اسکی سرپرست تنظیم راشٹریہ سوایم سیوک سنگھ (آرایس ایس) کی نفرت انگیز سوچ اور وزیر اعظم نریندر مودی کی خاموشی کی وجہ سے بھارت کو دنیا میں شرمندگی کا سامنا کرنا پڑ رہا ہے۔ کشمیر میڈیاسروس کے مطابق کانگریس کے ترجمان پون کھیڑا نے نئی دلی میں پارٹی ہیڈکوارٹر پر پریس کانفرنس میں کہا کہ اس وقت بھارت میںجو ماحول ہے وہ وزیر اعظم نریندر مودی ، وزیر داخلہ امیت شاہ اور آر ایس ایس سربراہ موہن بھاگوت کے سبب ہے۔ انہوں نے کہا کہ جو کچھ ہو رہا ہے اسکی فلم ان لوگوں نے ڈائریکٹ اور پروڈیوس کی ہے لہذا سائیڈ ادا کاروں کو سزا نہیں دی جاسکتی ۔ ترجمان نے کہا نفرت انگیز ماحول کی بنیادی وجہ آرایس ایس ہے لہذا اسے ہی ذمہ دار ٹھہرایا جانا چاہیے۔انہوں نے کہا کہ آر ایس ایس اور بی جے پی کی وجہ سے ملک شرمندہ ہو رہا ہے۔