اسلام آباد (مانیٹرنگ ڈیسک، آن لائن) سابق وفاقی وزیر داخلہ و عوامی مسلم لیگ کے سربراہ شیخ رشید نے انکشاف کیا ہے کہ مجھے انٹیلی جنس بیورو(آئی بی) نے 4 ماہ پہلے بتادیا تھا کہ آپ جارہے ہیں، میں نے دوتین ماہ انتظارکیا کہ آئی بی کی رپورٹ بعض اوقات سنی سنائی بھی ہوتی ہے۔
نجی ٹی وی کو اپنے ایک انٹرویو میں شیخ رشید کا کہنا تھاکہ عمران خان کوپتا تھا کہ یہ سارا ملبہ گرنا ہے، جس کوہم کہتے ہیں بارودی سرنگیں بچھاگئے، کچھ نہ کچھ توتھا کہ عمران خان نے گیس اوربجلی کی قیمتیں 10، 10 روپے کم کیں۔حکومت گرانے کے حوالے سے سابق وفاقی وزیر کا کہنا تھاکہ مجھے آئی بی نے 4 ماہ پہلے بتادیا تھا کہ آپ جارہے ہیں، عمران خان کوبتایا تو انہوں نے کہا کہ مجھے پہلے سے پتا ہے۔ان کا کہنا تھاکہ میں نے دوتین ماہ انتظارکیا کہ آئی بی کی رپورٹ بعض اوقات سنی سنائی بھی ہوتی ہے مگر یہ خبر سچ ثابت ہوئی۔اس طرح شیخ رشید کے اس بیان نے عمران خان کے امریکی سازش کے بیانیے سے ہوا نکال دی۔خیال رہے کہ عمران خان اپنی حکومت جانے کے بعد مسلسل یہ باتیں کر رہے ہیں کہ ان کی حکومت گرانے کے پیچھے امریکہ کا ہاتھ ہے ۔ اپوزیشن نے امریکہ کیساتھ ملکر سازش کی اور ان کی حکومت کو ختم کردیا۔
