اسلام آباد (این این آئی)پیپلز پارٹی کے رہنماء وفاقی وزیر سید خورشید شاہ نے کہاہے کہ فوج کا نیوٹرل ہونا ہی عمران کی مخالفت ہے، عمران خان کے مطالبے پر انتخابات قبل از وقت نہیں کروائیں گے، معیشت کی خطرناک حد تک خراب صورت حال میں اسے سنبھالنا آسان نہیں ہے۔

امریکی نشریاتی ادارے کو دیئے گئے انٹرویو میں انہوں نے کہاکہ عمران خان کے مطالبے پر انتخابات قبل از وقت نہیں کروائیں گے۔انہوں نے کہاکہ اتحادیوں کا حتمی فیصلہ ہے کہ حکومت اپنی مدت مکمل کرے گی۔ انہوں نے کہاکہ قبل از وقت انتخابات کے بارے میں اب ہم سوچنا بھی نہیں چاہتے،اتحادی جماعتیں شوق سے حکومت میں نہیں آئی ہیں۔ انہوں نے کہاکہ فوج اقتدار میں آنا چاہتی ہے تو ہم بلا رکاوٹ حکومت چھوڑنے کو تیار ہیں۔ خورشید شاہ نے کہاکہ معیشت کی خطرناک حد تک خراب صورت حال میں اسے سنبھالنا آسان نہیں ہے۔ وفاقی وزیر نے کہاکہ نیوٹرل کے حوالے سے عمران خان کا فلسفہ تبدیل ہوتا رہتا ہے۔ انہوں نے کہاکہ فوج کا نیوٹرل ہونا ہی عمران کی مخالفت ہے۔ وفاقی وزیر نے کہاکہ حکومت بجٹ اور انتخابی اصلاحات کے بعد انتخابات کروانا چاہتی تھی،عمران خان کی دھمکی کے بعد رواں سال انتخابات کا فیصلہ ترک کردیا۔ وفاقی وزیر نے کہاکہ عمران خان کے مطالبے پر انتخابات کی تاریخ دے رہے ہیں،آئندہ عام انتخابات اگست 2023 میں ہوں گے،مارچ کے دوران قانون ہاتھ میں لیا تو حکومت حرکت میں آئے گی۔ وفاقی وزیر نے کہاکہ اگر قتل وغارت ہوئی تو مقدمہ عمران خان پر ہوگا، حکومت فوج کو اسلام آباد میں بلانے کا ارادہ نہیں رکھتی۔ وفاقی وزیر نے کہاکہ عمران خان کی جان کو خطرے سے متعلق حکومت کو اطلاع نہیں،عمران خان کی جان کو کس سے خطرہ ہے چیف جسٹس کے علم میں لائیں۔