اسلام آباد (این این آئی)وزیر اعظم شہباز شریف نے صوبوں کو گندم کی خریداری کے لیے دئیے گئے اہداف پورے نا کرنے پر شدید برہمی کا اظہار کرتے ہوئے کہاہے کہ عوام کو کسی صورت مشکل میں نہیں ڈالا جا سکتا،وفاقی حکومت ہر صورت کم قیمت پر آٹا فراہم کرے گی۔ پیر کو جار ی اعلامیہ کے مطابق کسی قسم کی کمی کو برداشت نہیں کیا جاسکتا،وفاقی حکومت ہر ممکن مدد فراہم کر رہی ہے۔ وزیر اعظم نے کہاکہ صوبے یکم جون تک گندم خریداری کے اہداف پورے کریں۔ وزیراعظم نے کہاکہ سیاست سے بالاتر ہو کر وفاقی حکومت خیبرپختونخوا حکومت کی بھی ہر ممکن مدد کرے گی۔ شہباز شریف نے وزیر خوراک کو ہدایت کی کہ باہر سے درآمد کی جانے والی گندم کی صوبوں میں شفاف تقسیم کے لیے فوری کمیٹی قائم کی جائے۔ وزیر اعظم نے کہاکہ بہترین معیار کی گندم درآمد کو یقینی بنایا جائے۔ شہباز شریف نے کہاکہ غریب عوام کی خدمت اولین فریضہ ہے۔