اسلام آباد(آن لائن)پاکستان مسلم لیگ ن کے قائد نوازشریف نے اتحادی جماعتوں کے سربراہان کو ٹیلی فو ن کیا اورمعاشی پیکج اور انتخابی اصلاحات سے متعلق ن لیگ کے
فیصلوں پر اعتماد میں لیا۔ذرائع کے مطابق نوازشریف نے آصف زرداری،مولانا فضل الرحمان،سردار اختر مینگل،خالد مقبول صدیقی،خالد مگسی،محمود اچکزئی و دیگر سے روابط کیے۔نوازشریف نے آئندہ انتخابات سے قبل انتخابی اصلاحات سے متعلق ن لیگ کے فیصلوں پر اعتماد میں لیا۔ذرائع کے مطابق عوام کو ریلیف دینے اور سب سڈی کو محدود کرنے پر بھی بات چیت کی گئی۔ اتحادی جماعتوں کے سربراہان نے نواز شریف کو اپنے موقف سے آگاہ کیا ۔ نوازشریف نے وزیراعظم شہباز شریف کو بھی تمام اتحادیوں کو اعتماد میں لینے کی ہدایت کردی اور کہا کہ وزیراعظم سب سے مل کر ایک متفقہ لائحہ عمل مرتب کریں۔ ذرائع کاکہناہے کہ وزیراعظم کا آئندہ دو دن میں قوم سے خطاب بھی متوقع ہے وزیراعظم قومی سلامتی کمیٹی کے اجلاس میں بھی تمام صورت حال رکھیں گے۔
