کراچی(این این آئی)جامعہ کراچی خودکش حملے میں ایک اور خاتون کے ملوث ہونے کا انکشاف سامنے آیا ، دوسری خاتون نے سہولت کاری کی۔تفصیلات کے مطابق جامعہ کراچی میں خودکش حملہ آور کی ایک اور ویڈیو سامنے آگئی، جس میں یہ انکشاف سامنے آیا ہے کہ جامعہ کراچی

خودکش حملے میں دوسری خاتون نے سہولت کاری کی۔ویڈیو میں دیکھا جا سکتا ہے کہ خاتون خودکش حملہ آور نے ایک دوسری خاتون سے بیگ لیا ، ایک برقعہ پوش جامعہ کے اندرڈیپارٹمنٹ کے گیٹ کے سامنے کھڑی ہے۔ویڈیو کے مطابق خودکش حملہ آور خاتون رکشہ سے اترکر کچھ دورکھڑی ہوجاتی ہے ، جس کے بعد سفید اسکارف میں موجود خاتون حملہ آور کے پاس جاکرکچھ بات کرتی ہے ،بات چیت کے بعد حملہ آور خاتون دھماکے کی جگہ پرآجاتی ہے۔ویڈیو میں دیکھا گیا کہ حملہ آور خاتون نے تقریبا نو منٹ تک وین کا انتظار کیا۔دوسری جانب جامعہ کراچی میں خودکش دھماکے کے عینی شاہد انسٹیٹیوٹ کے سیکیورٹی گارڈ کے مطابق ڈائریکٹر انسٹیٹیوٹ معمول کیمطابق کلاس لینے آرہے تھے، جونہی گاڑی ٹرن ہونے لگی تو دھماکا ہوگیا۔عینی شاہد نے کہا کہ آواز بہت زور دار تھی، اپنی مددآپ کے تحت آگ بجھانے کی کوشش کرتے رہے، گاڑی میں ہماراایک سپروائزر بھی تھاجوزخمی ہوا جبکہ گاڑی میں سوار ایک غیر ملکی بھی زخمی ہوا۔انسٹیٹیوٹ کے سیکیورٹی گارڈنے کہاکہ 11 بجے کلاس آف ہونے کے بعد ڈائریکٹر لنچ کرکے دوپہر میں آتے تھے، ویڈیو میں نظر آنے والی خاتون کو اس سے پہلے کبھی نہیں دیکھاتھا، جب دھماکے کی آواز سنی تواوسان خطا ہوگئے تھے۔