اسلام آباد(مانیٹرنگ ڈیسک ، این این آئی)سینئر صحافی حامد میر نے دعویٰ کیا ہے کہ حکومت اور اپوزیشن کے درمیان مذاکرات ہوئے ہیں جس میں عدم اعتماد پر ووٹنگ 8 بجے کرانے کی یقین دہانی کرائی گئی ہے۔جیو نیوز کی تحریک عدم اعتماد کے حوالے سے خصوصی ٹرانسمیشن میں گفتگو کرتے ہوئے حامد میر نے کہا کہ قومی اسمبلی کے اسپیکر اسد قیصر کے چیمبر میں اپوزیشن اور
حکومتی رہنماؤں کے درمیان مذاکرات ہوئے جس میں طے پایا کہ دونوں فریقین کے تقریروں کے درمیان کوئی عمل دخل نہیں ہوگا اور ماحول خراب نہیں کیا جائے گا۔حامد میر نے کہا کہ شاہ محمود نے جے یو آئی کے مولانا اسعد محمود کو یقین دہانی کرائی ہےکہ تقاریر ہونے دیں جس کے بعد 8 بجے عدم اعتماد پر ووٹنگ کرائی جائے گی۔دوسری جانب اپوزیشن جماعت مسلم لیگ (ن) کے سینئر رہنما اور سابق اسپیکر قومی اسمبلی سردار ایاز صادق نے کہا ہے کہ قومی اسمبلی میں تحریکِ عدم اعتماد پر ووٹنگ کے لیے بلائے جانے والے اجلاس سے متعلق اسپیکر نے کہا ہے کہ اجلاس کل اتوار تک ملتوی کر دیتے ہیں۔ایاز صادق نے صحافیوں سے بات چیت میں کہا کہ اجلاس کیسے ایک دن کیلئے ملتوی کر سکتے ہیں، ووٹنگ لازمی ہے۔انہوں نے کہا کہ گزشتہ رات 3بجے تک اسپیکرسے ملاقات ہوئی کہ اجلاس کیسے چلائیں، اسپیکر نے کہا الیکشن کرا لیتے ہیں۔ایاز صادق نے کہا کہ اسپیکر کو ہم نے کہا کہ جب ہم پہلے کہہ رہے تھے تب کیوں نہیں کرایا، اب صرف عدم اعتماد پر ووٹنگ کرائی جائے۔علاوہ ازیں پاکستان مسلم لیگ (ن )کے رکن قومی اسمبلی احسن اقبال نے قومی اسمبلی کے اجلاس میں تاخیر سے متعلق کہا ہے کہ تاخیر سے پتہ لگ رہا ہیاس وقت کس کی کانپیں ٹانگ رہی ہیں۔
احسن اقبال نے میڈیا سے گفتگو کے دوران کہا کہ حکومت کی کانپیں ٹانگ رہی ہیں جو ووٹنگ کا سامنا نہیں کر پا رہی، اجلاس میں تاخیر کر کے یہ سب توہین عدالت کے مرتکب ہوں گے، سزا ملے گی۔ انہوں نے کہا کہ اسپیکر کو اجلاس چلانے کی اجازت نہیں مل رہی، اسپیکر قومی اسمبلی کا بنی گالہ میں رابطہ نہیں ہو رہا۔احسن اقبال نے کہا ہے کہ عمران نیازی پوری دنیا میں اشتہار لگوا رہے ہیں، دنیا دیکھ رہی ہے ایک شخص نے انا کی خاطر پورا سسٹم یرغمال بنایا ہوا ہے۔
