اسلام آباد (این این آئی)پاکستان مسلم لیگ (ن )کے مرکزی نائب صدر شاہد خاقان عباسی نے کہا ہے کہ اگر ہم سازش میں ملوث ہیں تو آرٹیکل 6 لگادیں۔ایک انٹرویومیں مسلم لیگ (ن )کے سینئر رہنما شاہد خاقان عباسی نے کہا کہ عسکری قیادت بتادے کیا سازش میں اپوزیشن ملوث ہے،

حکومت کی ملی بھگت سے آئین توڑا گیا ہے ان پر آرٹیکل 6 لگائیں۔انہوں نے کہا کہ بات صرف ڈپٹی اسپیکر کی رولنگ تک محدود نہیں ہے، سپریم کورٹ کو عسکری قیادت کو بھی بلانا چاہیے، تمام محرکات دیکھنے ہوں گے کہ آئین کو کیسے توڑا گیا۔اینکر نے سوال کیا کہ کیا نواز شریف ڈیل کے تحت بیرون ملک نہیں گے، شاہد خاقان نے جواب دیتے ہوئے کہا کہ ڈیل کو چھوڑیں، آئین توڑنے والوں پر آرٹیکل 6 لگنا چاہیے، ماضی کی ڈیلز ہیں تو کمیشن بنادیں سارا سچ سامنے آجائے گا۔شاہد خاقان نے کہا کہ موجودہ حکومت کو دھمکی دی گئی ہے تو انہیں سفیر کو نکالنا چاہیے تھا، ہم معاملے کی تہہ تک جانا چاہتے ہیں، آرٹیکل 6 ہم پر لگے یا عمران خان پر لگے گا۔ایک سوال کے جواب میں انہوں نے کہا کہ سپریم کورٹ کا فیصلہ ہم نہیں مانیں گے تو دوسری کوئی چوائس نہیں ہے، آئین توڑا گیا ہے، سپریم کورٹ کے فیصلے کا انتظار کرنا چاہیے۔