اسلام آباد (این این آئی)وزیراعظم عمران خان نے کہا ہے کہ وہ عام انتخابات کے اعلان پر پی ڈی ایم کے ردعمل پر حیران ہیں، جمہوری لوگ تو تائید و حمایت کیلئے ہمیشہ عوام ہی سے رجوع کرتے ہیں۔ٹوئٹر پر اپنی پوسٹ میں عمران خان نے کہا کہ پی ڈی ایم نے تو آسمان سر پر اٹھا رکھا تھا کہ ہماری حکومت ناکام ہوگئی ہے، ہماری حکومت ناکام ہوگئی ہے تو پھر آپ انتخابات سے خوفزدہ کیوں ہیں؟
عمران خان نے کہا کہ جمہوری لوگ تو تائید و حمایت کیلئے ہمیشہ عوام ہی سے رجوع کرتے ہیں، کیا پی ڈی ایم کیلئے یہ بہتر نہیں کہ انتخابات قبول کریں۔انہوںنے کہاکہ کیا پی ڈی ایم کیلئے یہ بہتر نہیں کہ حکومت گرانیکی غیر ملکی سازش میں آلہ کار بننے اور ضمیروں کی شرمناک منڈیاں سجا کر ہمارا قومی اخلاقی ڈھانچہ تباہ کرنیکے بجائے انتخابات قبول کریں؟۔ وزیر اعظم عمران خان نے کہا ہے کہ انھوں نے بیرونی مداخلت سے حکومت گرانے کی سازش کو ناکام بنا دیا ہے۔ قوم سے خطاب میں وزیر اعظم نے کہاکہ عوام فیصلہ کرے، بیرونی سازش سے پیسوں کی بوریوں سے ملک کی تقدیر کا فیصلہ نہ کیا جائے، وہ لوگ جو سارے اچکن سلوا کر بیٹھے ہوئے ہیں،انھوں نے لوگوں کو خریدنے کے لیے کروڑوں روپے خرچ کیے یہ سارا پیسہ اب ضائع ہوگا۔انھوں نے کہا کہ جن لوگوں نے یہ پیسہ لیا ہے میں آپ سب کو کہتا ہوں ابھی بھی کوئی ثواب کما لیں، کوئی پناہ گاہ پر لگا دیں اور یتیم خانہ کھول دیں،کوئی غریبوں میں پیسہ تقسیم کر دیںاور میں اپنی قوم کو کہتا ہوں کہ آپ الیکشنز کی تیاری کریں،آپ نے فیصلہ کرنا ہے،کسی باہر کی قوت کسی کرپٹ لوگوں نے فیصلہ نہیں کرنا کہ اس ملک کا مستقبل کیا ہوگا (بلکہ) آپ کو فیصلہ کرنا ہے۔عمران خان نے کہا کہ صدر کو ایڈوائس جانے کے بعد اسمبلیاں تحلیل ہوجائیں گی اور پھر آگے جو بھی عمل ہے اگلے انتخابات کا یا عبوری حکومت کا وہ اب شروع ہوجائیگا، اپنی قوم کو مبارک دیتا ہوں اور اللہ کا شکر ادا کرتا ہوں۔
