اسلام آباد (مانیٹرنگ ڈیسک، این این آئی) وزیر اعظم عمران خان کے خلاف تحریک عدم اعتماد پر جواری بھی بھاگ گئے ، سٹے میں بھی وزیر اعظم کا ریٹ انتہا کی حد تک گر گیا ، روزنامہ جنگ میں ایوب ناصر کی شائع خبر کے مطابق تحریک عدم اعتماد پر ہونیوالے جوئے میں
اپوزیشن پر سٹہ کھیلنے والوں کو ایک لاکھ پر منافع صرف 5 ہزار روپے رہ گیا ہے جبکہ وزیر اعظم کی کامیابی پر سٹہ کھیلنے والوں کو 5ہزارروپےکے بدلے ایک لاکھ روپے ملنے کی شرطیں لگ رہی ہیں۔دوسری جانب وزیراعظم عمران خان نے تحریک عدم اعتماد کے بعد اسمبلی سے استعفیٰ دینے کے آپشن پرغورشروع کردیا ہے۔ذرائع کے مطابق وزیراعظم عمران خان اور تحریک انصاف نے تحریک عدم اعتماد کے بعد دیگر آپشنز پر غور شروع کردیا ہے۔تحریک عدم اعتماد میں حکومت کو ناکامی کی صورت میں وزیر اعظم عمران خان اسمبلیوں سے استعفے دینے کا کارڈ استعمال کر سکتے ہیں۔ذرائع کا کہنا ہے کہ وزیراعظم عمران خان کوتجویز دی گئی ہے کہ کرپٹ حکمرانوں کے ساتھ اپوزیشن میں بیٹھنے سے بہتر ہے کہ تحریک انصاف کے ارکان اوراتحادیوں کی جانب سے اجتماعی استعفے دیئے جائیں۔ استعفوں سے نئی حکومت بحران سے دوچار ہو جائے گی۔ذرائع کے مطابق اتنی سیٹوں پر ضمنی الیکشن کرانا مشکل ہو گا۔ یہی مشق پنجاب اور خیبر پختونخوا میں بھی بیک وقت کی جا ئے گی۔ذرائع کا کہنا ہے کہ وزیر اعظم یہ سمجھتے ہیں کہ فوری طور پر الیکشن میں جانا ان کے لیے سود مندثابت ہوگا۔ قومی اسمبلی میں پی ٹی آئی کے ارکان کی تعداد155 ہے جبکہ قومی اسمبلی 342 نشستوں پر مشتمل ہے۔
