اسلام آباد(این این آئی)ضلعی انتظامیہ کی جانب سے حکومت اور اپوزیشن کو ریڈ زون میں جلسہ کرنے سے روک دیا گیا ۔ذرائع کے مطابق ضلعی انتظامیہ میں حکومت کو پریڈ گراؤنڈ اور اپوزیشن کو ایچ 9 میں جلسہ کرنے کا آپشن دیا گیا، ضلعی انتظامیہ کا مؤقف ہے کہ ریڈ زون میں زیادہ لوگوں کے آنے سے سیکیورٹی مسائل ہوں گے۔

ذرائع کے مطابق ضلعی انتظامیہ نے کہا کہ جگہ تبدیلی کے آپشن پر غور کر کے ضلعی انتظامیہ کو آگاہ کیا جائے، ضلعی انتظامیہ کا موقف ہے اسلام آباد کے ریڈ زون میں دفعہ 144 نافذ ہے۔ذرائع کے مطابق ضلعی انتظامیہ کے مطابق ریڈ زون میں عوام کے اجتماع کی اجازت نہیں دی جا سکتی۔دوسری جانب وزیر مملکت اطلاعات فرخ حبیب نے کہاہے کہ ضمیروں کے سودے کیے جا رہے ہیں،جمہوریت کی مضبوطی کیلئے سیاست میں پیسے کا استعمال روکنا ہو گا۔ میڈیا سے گفتگو کرتے ہوئے انہوں نے کہاکہ سب نے دیکھا کہ سینیٹ انتخابات میں بھی پیسہ چلا،اب بھی ضمیروں کے سودے کیے جا رہے ہیں،جمہوریت کی مضبوطی کے لئے سیاست میں پیسے کا استعمال روکنا ہو گا۔ فرخ حبیب نے کہاکہ سپریم کورٹ کے سامنے پاکستان کی تاریخ کا انتہائی اہم معاملہ ہے۔ انہوں نے کہاکہ پاکستان کی معیشت کی سمت درست ہے، برآمدات بڑھ رہی ہیں۔ انہوں نے کہاکہ وزیراعظم عمران خان اگلے پانچ سال کے لئے بھی منتخب ہوں گے۔ انہوں نے کہاکہ آئین کے تحت سب کو پرامن احتجاج کا حق حاصل ہے،جلسہ ضرور کریں، قانون کی خلاف ورزی کریں گے تو کارروائی ہو گی۔ فرخ حبیب نے کہاکہ اتحادیوں کو پہلے بھی ساتھ لے کر چلے ، آئندہ بھی ساتھ لے کر چلیں گے،سازشی عناصر پہلے دن سے حکومت کے خلاف سازشوں میں ملوث ہیں۔ فرخ حبیب نے کہاکہ منحرف ارکان واپس آئیں گے اور مٹھائیاں کھانے والے روتے نظر آئیں گے۔