لاہور( این این آئی)پاکستان پیپلزپارٹی کے چیئرمین بلاول بھٹو زرداری کے ترجمان ذوالفقار علی بدر نے کہا ہے کہ سپیکر قومی اسمبلی نے اگر او آئی سی اجلاس کی آڑ میں عدم اعتماد کی تحریک کو التوا ء کا شکار کیا تو ردعمل تو آئے گا، چیئرمین بلاول بھٹو زرداری او آئی سی کے خلاف نہیں
بلکہ او آئی سی کی آڑ میں تحریک عدم اعتماد سے حکومت کے فرار کے خلاف ہیں۔ اپنے بیان میں انہوں نے کہا کہ او آئی سی میں نئی روح پھونکنے والی جماعت پاکستان پیپلزپارٹی ہے، بلاول بھٹو کے نانا نے تنظیم تعاون اسلامی کو پہچان دی، عمران خان اسپیکر قومی اسمبلی سے ساز باز کرکے او آئی سی کانفرنس کی آڑ میں تحریک عدم اعتماد کے معاملے کو اپریل تک ٹالنا چاہتے ہیں۔ انہوں نے کہا کہ عمران خان کو اپریل فول نہیں منانے دیں گے، مارچ میں ہی تبدیلی کا جنازہ اٹھے گا بصورت دیگر دمادم مست قلندر ہوگا۔انہوں نے کہا کہ اگر عمران خان نے خود کو بچانے کے لئے او آئی سی کانفرنس کی آڑ لی تو یہ تنظیم تعاون اسلامی کے مقاصد کا بھی غلط استعمال ہوگا، تحریک عدم اعتماد ایک جمہوری و آئینی حق ہے، کسی بھی چیز کی آڑ لے کر ہم سے دستوری حق نہیں چھینا جاسکتا، بلاول بھٹو زرداری کا ایجنڈا صرف اور صرف پاکستان ہے، غیرملکی ایجنڈے کی باتیں کھسیانی بلی کھمبا نوچے کے مترادف ہیں۔
