سیالکوٹ(این این آئی)پاکستان مسلم لیگ (ن) کے سینئر رہنما خواجہ آصف نے کہا ہے کہ عمران خان کے قریبی وزراء بھی ہمارے رابطے میں ہیں، ہم سے جو رابطہ کر رہے ہیں ان میں چند کو لینا بھی چاہتے ہیں۔میڈیا سے گفتگو کرتے ہوئے خواجہ آصف نے کہا کہ یہ خود چوہدری براداران، ایم کیو ایم کے پاس جا رہے ہیں کیا یہ عالمی سازش ہے؟
خواجہ آصف نے کہا کہ عدم اعتماد کی تحریک آئین کے مطابق لائی جارہی ہے۔رہنما مسلم لیگ (ن) نے کہا کہ ہم انٹرنیشنل بھکاری بن گئے، مہنگائی میں ہمارا تیسرا نمبر ہے، مہنگائی 100 فیصد بڑھی ہے، ماضی میں ایسا کبھی نہیں ہوا۔خواجہ آصف نے کہا کہ اندرونی معاملات کو درست نہیں کریں گے تو بہتری نہیں آئے گی، جو بیانیہ عمران نے اپنایا اس میں کونسی بات پوری ہوئی۔انہوں نے کہا کہ کیا آئی ایم ایف سے نجات ہوئی؟ 40 فیصد لوگ غربت کی لکیر سے نیچے چلے گئے ہیں۔سابق وزیر دفاع خواجہ آصف نے کہا کہ تحریک عدم اعتماد میں نواز شریف کے ساتھی سیسہ پلائی ہوئی دیوار بنے ہوئے ہیں۔ انہوں ںے کہا کہ 70 کروڑ روپے اسمبلی ہال کی تعمیر میں لگائے جا رہے ہیں۔انہوں نے کہا کہ عمران خان نے ہمیں عالمی بھکاری بنا دیا ہے لیکن عوام کے ساتھ جو زیادتی ہوئی ہے اس کا حساب لیں گے۔خواجہ آصف نے کہا کہ پشاور مسجد میں دھماکہ ہوا جس میں 62 سے زائد جانیں چلی گئیں۔ انہوں نے کہا کہ کلمہ گو اور انسانوں کا قتل عام ظلم ہے ہم اس کی مذمت کرتے ہیں۔ انہوں نے کہا کہ کسی کو حق حاصل نہیں کی وہ کسی مسلمان بھائی کی جان لے۔ انہوںنے کہاکہ نوازشریف نے دہشت گردی ختم کی لیکن اب دوبارہ پنپ رہی ہے۔ن لیگ کے مرکزی رہنما خواجہ آصف نے کہا کہ کھاد، چینی ، گھی ، پٹرول اور گندم کی چیزوں پر کوئی کنٹرول نہیں ہے۔ ان کا کہنا تھا کہ اسلام آباد چوروں اور ڈاکوؤں کی پناہ گاہ بن گیا ہے۔
