لندن (این این آئی) پرنس آف ویلز، شہزادہ چارلس کی اہلیہ کمیلا پارکر روس یوکرین تنازع سے متاثرہ لوگوں سے ملاقات کے دوران رو پڑیں۔برطانوی میڈیا کے مطابق،
کمیلا پارکر نے اپنے شوہر، شہزادہ چارلس کے ساتھ لندن میں موجود یوکرینئن کیتھولک کیتھیڈرل کا دورہ کیا، جہاں اْنہوں نے جنگ سے متاثرہ لوگوں کو تسلی دی۔ شاہی جوڑے کو وہاں موجود لوگوں نے ان تکالیف کے بارے میں بتایا جوکہ یوکرین کے باشندوں کو روسی جارحیت کی وجہ سے سہنا پڑ رہی ہیں۔ذرائع کے مطابق، کمیلا پارکر نے یوکرینی سفیر کی اہلیہ سے بات کرتے ہوئے کہا کہ ’وہ جنگ زدہ ملک کیلئے دعا گو ہیں‘۔کمیلا پارکر کے ترجمان نے کہا کہ’کوئی بھی یوکرینی شہریوں کو اپنے گھروں سے نقل مکانی کرتے دیکھ کر ان خوفناک مناظر کو نظر انداز نہیں کرسکتا اور ڈچز آف کارنووال ہر طرح سے یوکرینی لوگوں کی مدد کرنا چاہتی ہیں‘۔دوسری جانب شہزادہ چارلس نے بھی روس کی جانب سے یوکرین پر کیے گئے حملوں سے متاثرہ لوگوں کے حوصلے بلند کیے اور ان کی غیر معمولی بہادری اور استقامت کی تعریف کی۔
