لاہور (آن لائن) محکمہ سکول ایجوکیشن پنجاب میں60 سال سے زائد عمر کے اساتذہ کی ریٹائرمنٹ کے باوجود محکمہ خزانہ سے تنخواہیں موصول کرنے کا انکشاف ہوا ہے۔

اس انکشاف کے بعد محکمہ سکول ایجوکیشن پنجاب نے ریٹائرڈ اساتذہ کا ریکارڈ درست کرنے کے احکامات جاری کردئیے ہیں۔ بتایا گیا ہے کہ پنجاب بھر کے سکولوں میں 217 اساتذہ ایسے ہیں جو اپنی 60 سال کی عمر مکمل کرنے کے بعد ملازمت سے ریٹائرڈ ہوچکے ہیں۔ جن میں سے 12 اساتذہ کا تعلق لاہور سے ہے لیکن محکمہ کی غفلت اور لاپرواہی کی وجہ سے ریٹائرڈ ہونے والے ان اساتذہ کا ریکارڈ درست نہیں کیا گیا۔ جس کے باعث مذکورہ اساتذہ سرکاری خزانے سے بدستور تنخواہیں موصول کر رہے ہیں۔ جس سے محکمہ خزانہ پنجاب کو کروڑوں روپے کے نقصان کا سامنا کرنا پڑا ہے۔ اس ساری بگڑتی ہوئی صورتحال کا ذمہ داری محکمہ سکول ایجوکیشن پنجاب کے عملے کو ٹہرایا گیا ہے۔