لاہور (این این آئی) اینٹی کرپشن پنجاب نے کارروائی کے دوران راولپنڈی سے سرکاری ڈاکٹر ، پاک پتن اور شیخوپورہ سے پٹواری کو گرفتار کرلیا ۔اینٹی کرپشن پنجاب نے سرکاری زمین پر قبضہ کرنے کے جرم میں پاک پتن سے پٹواری سمیت 5 افراد کو گرفتار کر لیا۔ ملزمان نے

محکمہ مال کے افسران کی ملی بھگت سے 62 ایکڑ سرکاری زمین پر قبضہ کیا تھا۔اینٹی کرپشن نے قبضہ مافیا کے خلاف کارروائی کرتے ہوئے سرکاری زمین بھی واگزار کروائی۔مقدمہ میں نامزد پٹواری محمد نواز، لیاقت علی، محمد زمان، محمد لقمان اور شوکت علی کو گرفتار کر لیا گیا ہے۔شیخوپورہ میں چھاپہ کے دوران مقدمہ میں نامزد 2 افراد کو گرفتارکیاگیا ۔ملزم ریاست علی نے پٹواری مختار احمد اور دیگر ملزمان کی ملی بھگت سے شہری کی 45 کنال زمین جعلسازی سے فروخت کی۔مقدمہ 232/2019 میں اشتہاری ملزمان پٹواری مختار احمد اور ریاست علی کو نارنگ منڈی سے گرفتار کیا گیا۔راولپنڈی سے تحصیل ہیڈ کوارٹر ہسپتال گجر خان کے ڈاکٹر کو گرفتار کیاگیا ڈاکٹر حسن جاوید کو میڈیکل رپورٹ میں ردوبدل کرنے پر گرفتار کیا گیا۔ملزم نے بے نظیر ہسپتال راولپنڈی میں اپنی تعیناتی کے دوران رشوت لے کر میڈیکل رپورٹ میں ردوبدل کی۔ ملزم کے خلاف مقدمہ 37/2017 تھانہ اینٹی کرپشن راولپنڈی میں درج ہے۔