کراچی(این این آئی)کراچی میں تبلیغی جماعت کا اجتماع اتوار کو رقت آمیز دعاؤں کے ساتھ اختتام پذیر ہوگیا۔مبصرین کے مطابق اجتماع کے آخری بیان اور دعا میں لاکھوں افراد موجود تھے۔اتوار کو نماز فجر کے بعد اجتماع میں اختتامی بیان بھائی چوہدری رفیق نے کیا۔انہوں نے
اپنے بیان میں کہا کہ تمام مسائل کا حل نماز میں ہے اگر ہم رسولؐ کی سنت کے مطابق زندگی گزاریں گے تو ہماری مشکلات ختم ہوجائیں گی۔اپنی زندگی میں تبلیغ راستہ چن لیں۔لوگوں کو دین کی دعوت دیں۔اصل زندگی کی تیاری کریں۔گناہوں سے بچیں۔نیکی کا راستہ اختیار کریں۔ہر وقت توبہ واستغفار کریں۔اگر ہم دین پر چلیں گے تو دنیا کے ساتھ آخرت میں بھی کامیاب ہوجائیں گے۔بیان کے بعد ہدایات بھائی نعیم شاہ نے دیں۔اجتماع کے آخر میں رقت آمیز دعا مولانا احمد بٹلہ صاحب نے کرائی۔دعا کراتے ہوئے انہوں نے کہا کہ اے اللہ ہم سب کے گناہوں کو بخش دے۔ہماری تمام مشکلات و پریشانیوں کو ختم فرمادے۔تمام بیماریوں اور وبا کو ختم فرمادے۔ہم سب کو دین کا کام کرنے کی توفیق عطا فرما۔پاکستان میں امن و سلامتی قائم فرما۔وطن عزیز کی حفاظت فرما۔بھائی چارگی پر چلنے کی توفیق دے.امت مسلمہ کے مسائل حل فرمادے۔ہماری تمام دعاؤں کو قبول کرلے۔دعا کے بعد چار روزہ اجتماع اختتام پذیر ہوگیا۔اجتماع میں تمام انتظامات و سہولیات مثالیں تھیں۔عوام کے جم غفیر کے باعث اجتماع گاہ کی موجودہ جگہ بھی کم پڑگئی۔اجتماع کے موقع پر سیکیورٹی کے سخت انتظامات کیے گِئے تھے۔
