کراچی(این این آئی)سندھ پولیس کے شعبہ انسدادِ دہشت گردی کی کارروائی میں لائنز ایریا سے گرفتار کور کمانڈر حملہ کیس کے ملزم اور جنداللہ کے رکن سید کاشف علی شاہ عرف شاہین سے حساس اداروں نے بھی تفتیش شروع کر دی ہے۔سی ٹی ڈی کے انچارج راجہ عمر خطاب کے مطابق

ملزم سے مشترکہ تحقیقات کے لیے کائونٹر ٹیرر ازم ڈپارٹمنٹ کی جانب سے جے آئی ٹی کی تشکیل کے لیے محکمہ داخلہ سندھ کو خط لکھ دیا گیا ہے۔سی ٹی ڈی سندھ کی ریڈ بک کے 9 ویں ایڈیشن میں رجسٹرڈ ملزم سید کاشف کی زندہ یا مردہ گرفتاری پر محکمہ داخلہ سندھ نے 5 لاکھ روپے انعام مقرر کر رکھا تھا۔حکام کے مطابق ملزم کراچی میں 2004 کے دوران کور کمانڈر کراچی پر حملہ کرنے والے گروہ میں شامل تھا۔شاہ فیصل کالونی کراچی کے رہائشی ملزم سے جوائنٹ انٹیروگیشن کی صورت میں ماضی، حال اور مستقبل کے جرائم کی تفصیلات سامنے آ سکیں گی۔