اسلام آباد( آن لائن) الیکشن کمیشن نے اسلام آباد میں بلدیاتی الیکشن کیلئے وفاقی حکومت سے 3900الیکٹرانک ووٹنگ مشینیں مانگ لیں۔ ذرائع کے مطابق اسلام آباد
میں بلدیاتی الیکشن الیکٹرانک ووٹنگ مشین سے کرانے کے معاملے پر الیکشن کمیشن نے وفاقی حکومت سے 3900الیکٹرانک ووٹنگ مشینیں مانگ لیں۔وزیراعظم عمران خان نے وزارت سائنس و ٹیکنالوجی کو 3900 مشینیں فراہم کرنے کی ہدایت کرتے ہوئے کہا ای وی ایم پر تمام وسائل فراہم کئے جائیں جبکہ وزیراعظم آفس کی مددچاہیے ہوتووہ بھی دی جائے۔دوسری جانب وزیر سائنس و ٹیکنالوجی شبلی فراز نے کہا کہ اسلام آباد میں بلدیاتی انتخابات پندرہ اپریل کو ہوں گے، ٹریننگ اور ٹیسٹنگ کیلئے پچاس ای وی ایم الیکشن کمیشن کو فوری فراہم کی جارہی ہیں۔ پندرہ اپریل سے پہلے 3900 ای ایم ایمز الیکشن کمیشن کو فراہم کردی جائیں گی۔
