لاہور( این این آئی)مری سانحہ کے محرکات کے حوالے سے ابتدائی رپورٹ وزیراعلی پنجاب سردار عثمان بزدار کو پیش کردی گئی ہے۔ذرائع کے مطابق رپورٹ راولپنڈی ڈویژن

انتظامیہ کی جانب سے پیش کی گئی، رپورٹ میں واقعے کے ممکنہ محرکات کو بیان کیا گیا ہے۔ابتدائی رپورٹ میں بتایا گیا کہ گزشتہ 3 روز کے دوران ایک لاکھ سے زائد گاڑیاں مری میں داخل ہوئیں، 12ہزارگاڑیاں واپس آئیں اورباقی برف میں پھنس گئیں۔رپورٹ میں کہا گیا کہ محکمہ موسمیات نے غیر معمولی برف باری کا نہیں بتایا تھا، 5 فٹ سے زائد برفباری ہوئی جس کی اطلاع نہیں تھی۔وزیراعلی پنجاب کو مری سانحے پر پیش کی گئی ابتدائی رپورٹ میں بتایا گیا کہ 6 جنوری کی رات سے مری جانے کا راستہ بند کردیا تھا، رش بڑھنے کے باعث لوگوں کوروکتے رہے، اخبارات میں اشتہارات بھی دئیے، پھر بھی بڑی تعداد میں سیاح مری پہنچ گئے۔رپورٹ میں بتایا گیا ہے کہ زیادہ بڑا حصہ خیبرپختونخوا ہ کی سائیڈ کا متاثر ہواہے، راستہ کھولنے کے ساتھ لوگوں کو ریسکیو کرنا شروع کردیا ہے۔