اسلام آباد،مری (این این آئی) مری میں پھنس جانے والے اے ایس آئی نوید اقبال تین بیٹیوں اور ایک بیٹے سمیت جاں بحق ہوگئے ۔ تفصیلات کے مطابق مرحوم کی بیوی اور ایک بیٹا اسلام آباد گھر پر موجود ہیں،اے ایس پی کوہسار بنش، ایس ایچ او کوہسار مرحوم کے لواحقین کے گھر
موجود ہیں ،مرحوم اے ایس آئی نوید اقبال تھانہ کوہسار میں تعینات تھے۔مرحوم اے ایس آئی تلہ گنگ کے گائوں ددھیال ضلع چکوال کے رہائشی ہیں۔آئی جی اسلام آباد نے کہاکہ اسلام آباد پولیس اس کڑے وقت میں لواحقین کے ساتھ کھڑی ہے، مرحوم اے ایس آئی کے لواحقین سے ہر ممکن تعاون کیا جائے گا۔ محمد احسن یونس نے کہا کہ اسلام آباد پولیس راولپنڈی انتطامیہ کے ساتھ رابطے میں ہے، اسلام آباد پولیس کی امدادی ٹیم بھی مری روانہ ہے۔ دوسری جانب مری میں پھنسے لوگوں کو نکالنے اور ان کی امداد کے حوالے سے قائم کیے گئے کنٹرول روم کے ذرائع نے کہا ہے کہ ملکہ کوہسار مری میں گزشتہ روز 1 لاکھ سے زائد گاڑیاں داخل ہوئیں، رات بھر بجلی کی فراہمی بند رہی۔کنٹرول روم ذرائع کے مطابق لوگ گاڑیاں سڑکوں پر کھڑی کر کے چلے گئے، سڑکوں پر گاڑیاں کھڑی ہونے کی وجہ سے امدادی سرگرمیوں میں مشکلات کا سامنا رہا۔کنٹرول روم ذرائع نے بتایا کہ ہیوی مشینری سے برف کی کٹائی اور اسے راستے سے ہٹانے کا عمل جاری رہا۔کنٹرول روم ذرائع کا کہنا ہے کہ مری میں بہت سی گاڑیوں میں لوگ چھوٹے بچوں کے ساتھ بھی پھنسے ہوئے ہیں، گاڑیوں میں لوگوں کے پاس کھانے پینے کیلئے کچھ نہیں ۔
