اسلام آباد (این این آئی)پاکستان مسلم لیگ (ن) کی ترجمان مریم اورنگزیب نے ثبوت کے ٹرک اور صندوقوں سمیت عمران خان اور شہزاد اکبر کی گمشدگی کا اشتہار شائع کرنے کا مطالبہ کرتے ہوئے کہا ہے کہ عمران صاحب اور شہزاد اکبر شہباز شریف کے خلاف جھوٹے الزامات کے ثبوتوں کے صندوق لے کر عدالت نہ پہنچ سکے،عمران صاحب اور شہزاد اکبر شہباز شریف کے خلاف ثبوتوں کا

ٹرک لے کر لا پتہ ہیں،روزانہ سماعت کی درخواست کرنے والے 16 ماہ گزرنے کے باوجود انوسٹیگیشن رپورٹ جمع نہیں کرا سکے ۔ اپنے بیان میں مریم اور نگزیب نے کہاکہ شہباز شریف کے خلاف ’’ثبوت‘‘سے بھرے ایف آئی اے ٹرک کے ٹائر پنکچر ہوگئے شاید ،نہ عمران صاحب اور شہزاد اکبر آئے نہ ثبوتوں کے ٹرک آئے اور نہ ثبوتوں کے صندوق پہنچے ۔انہوںنے کہاکہ کہاں ہیں ثبوتوں کے وہ صندوق جو آج پیش ہونے تھے ؟16 ماہ گزر گئے، ایف آئی اے کی رپورٹ پیش نہ ہوسکی، ثبوت کب پیش کریں گے؟،۔انہوںنے کہاکہ شہباز شریف نے ڈٹ کر عمران صاحب کے سیاسی انتقام اور جھوٹ کا ملک میں اور بیرون ملک ہر عدالت میں مقابلہ کیا ہے،بشیر میمن نے عمران صاحب کے منہ پر گواہی دی کہ شہباز شریف کے خلاف کیس نہیں بنتا۔ انہوںنے کہاکہ نیب کے 58 والیمز نے گواہی دی کی ایک دھیلے کی کرپشن، کک بیک، اختیارات کا ناجائز استعمال نہیں ہوا،12 ماہ شہباز شریف کو ناحق جیل میں قید کیا لیکن کرپشن نہ ملی ،اب ایف آئی اے 16 ماہ سے تفتیش مکمل نہیں ہو پا رہی، عمران صاحب 100 سال بھی تفتیش کریں تو کرپشن نہیں ملے گی کیونکہ آپ نے جھوٹ بولا تھا۔