اسلام آباد (این این آئی)محکمہ موسمیات نے اگلے ہفتے سے 2022ء کی پہلی بارش اور پہاڑوں پر برف باری کی پیشگوئی کر دی۔محکمہ موسمیات کے مطابق مغربی ہواؤں کا سلسلہ 2 جنوری کی شام سے ملک کے مغربی اور بالائی علاقوں میں داخل ہو گا،2 سے 6 جنوری 2022ء

کے دوران کراچی، کوئٹہ، زیارت، پشین، بارکھان اور راجن پورمیں تیز ہوا کے ساتھ بارش کا امکان ہے۔3 سے 7 جنوری کے دوران وفاقی دارالحکومت اسلام آباد، راولپنڈی، کشمیر، گلگت، سوات، مانسہرہ، پشاور، اٹک، لاہور اور جہلم میں تیز ہواؤں کے ساتھ بارش کی پیش گوئی کی گئی ہے۔اس دوران مری، کوئٹہ، زیارت، پشین، گلیات، ناران، کاغان، ہنزہ، سوات اور مالم جبہ میں شدید برف باری کی پیش گوئی بھی کی گئی ہے۔محکمہ موسمیات نے بتایا کہ گندم کی فصل کے لیے موسمِ سرما کی یہ ہونے والی بارشیں فائدہ مند ثابت ہوں گی۔محکمہ موسمیات نے 3 سے 5 جنوری کے دوران موسلا دھار بارش کے باعث ندی نالوں میں طغیانی کا خدشہ بھی ظاہر کیا ہے۔محکمہ موسمیات کا کہنا ہے کہ 4 سے 6 جنوری کے دوران شدید برف باری سے پہاڑی علاقوں میں راستے بند ہونے کا خدشہ بھی ہے۔محکمہ موسمیات کی جانب سے اس حوالے سے پہلے سے ضرورت انتظامات کرنے کے لیے تمام متعلقہ اداروں کے لیے الرٹ بھی جاری کر دیا گیا ہے۔