قاہرہ (این این آئی )مصر میں ایک خوفناک حادثے میں دلہن، اس کی کزن اور دولہا کا بھائی اسماعیلیہ گورنری میں القصاصین زقازیق زرعی روڈ پر ایک موٹر سائیکل اور ٹرک کے درمیان تصادم میں مارے گئے۔عرب ٹی وی کے مطابق

اسماعیلیہ سیکیورٹی ڈائریکٹوریٹ کو القصاصین پولیس اسٹیشن کی جانب سے ایک اطلاع موصول ہوئی جس میں بتایا گیا کہ ایک نوجوان اور موٹرسائیکل سوار لڑکیاں سبزی لے جانے والے ٹرک سے ٹکرا گئیں جس کے نتیجے میں تینوں افراد موقعے پر ہی دم توڑ گئے۔حادثے میں فوت ہونے والے شہریوں کی لاشیں التل الکبیر سینٹرل اسپتال کے مردہ خانے میں منتقل کر دی گئی ہیں۔ واقعے کے حوالے سے رپورٹ جاری کر دی گئی ہے اور پبلک پراسیکیوشن کو تحقیقات شروع کرنے کے لیے مطلع کر دیا گیا ہے۔حادثے میں فوت ہونے والی دو لڑکیوں میں سے ایک 23 سالہ اسما محمد ناجی کی شادی کی تقریبات شروع ہو چکی تھیں۔ حادثے میں فوت ہونے والی دوسری لڑکی کی شناخت ہاجر توفیق ابراہیم اور لڑکے کی شناخت محمد فتحی ابراہیم کے ناموں سے کی گئی ہے۔