لاہور( این این آئی)پاکستان نے رواں مالی سال کے پانچ ماہ میں جولائی تا نومبر 33 ارب ڈالر کی اشیا ء درآمد کیں جبکہ 20 ارب 64 کروڑ ڈالر کا تجارتی خسارہ ریکارڈ کیا گیا۔ادارہ شماریات کی پانچ ماہ کی مشترکہ

رپورٹ کے مطابق اس مدت میں ساڑھے 81 کروڑ ڈالر کی کاریں درآمد کی گئیں جوکہ 150 فیصد تک اضافہ بنتا ہے جبکہ 112 فیصد اضافے سے 8 ارب 37 کروڑ ڈالر کی پیٹرولیم مصنوعات درآمد کی گئیں۔4 ارب ڈالر یعنی 673 ارب روپے کی خوراک درآمد کی گئی جس میں دودھ، کریم، گندم، چائے، چینی، مصالحے، سویا اور پام آئل اور دیگر اشیا ء شامل ہیں، خوراک کی درآمد میں 33 فیصد اضافہ ہے۔رپورٹ کے مطابق 85 کروڑ 67 لاکھ ڈالر کے فونز سمیت 4 ارب 80 کروڑ ڈالر کی مشینری درآمد کی گئی جبکہ 58 فیصد اضافے سے 2 ارب ڈالر کی ٹیکسٹائل اشیا ء درآمد کی گئیں۔کیڑے مار ادویات سمیت 6 ارب ڈالر کا زرعی سامان منگوایا گیا جبکہ 2 ارب 76 کروڑ ڈالر کا سونا، لوہا، اسٹیل اور ایلومینیم درآمد کیا گیا۔

موضوعات:درآمد