پشاور (این این آئی)پاکستان تحریکِ انصاف میں شمولیت اختیار کرنے والے غضنفر بلور نے تنقید کر نے والوں کو جواب دیتے ہوئے کہا ہے کہ مجھے کوئی سیاست نہ سکھائے، مجھے اچھی طرح سیاست آتی ہے،پی ٹی آئی میں شمولیت میرا ذاتی فیصلہ ہے، میرے خاندان میں کسی قسم کا تنازع نہیں ،عمران خان

ملک کو ترقی نہ دیتے تو کے پی میں پی ٹی آئی کی دو بار حکومت نہ آتی۔پشاور میں غضنفر بلور نے پریس کانفرنس کرتے ہوئے کہا کہ حاجی غلام احمد بلور کو والد کا درجہ دیتا ہوں۔انہوں نے کہا کہ پی ٹی آئی میں شمولیت میرا ذاتی فیصلہ ہے، میرے خاندان میں کسی قسم کا تنازع نہیں ہے، میرا تعلق بزنس کمیونٹی سے ہے۔تحریکِ انصاف میں شامل ہونے والے غضنفر بلور نے کہا کہ 2013ء میں الیکشن لڑ چکا ہوں، جو کہتے ہیں میں سیاسی نہیں، وہ میرے بعد سیاست میں آئے۔انہوں نے کہا کہ میں وزیرِ اعظم عمران خان کی پالیسیز پر مکمل اعتماد کرتا ہوں، وہ ملک کو ترقی نہ دیتے تو کے پی میں پی ٹی آئی کی دو بار حکومت نہ آتی۔واضح رہے کہ غضنفر بلور 2 روز قبل پاکستان تحریکِ انصاف (پی ٹی آئی) میں شامل ہوئے ہیں۔غضنفر بلور کے والد الیاس بلور اور خاندان کے بیشتر افراد عوامی نیشنل پارٹی (اے این پی) سے وابستہ ہیں۔گزشتہ روز عوامی نیشنل پارٹی (اے این پی) کے سینئر رہنما حاجی غلام احمد بلور نے جاری کیئے گئے ایک بیان میں اس حوالے سے کہا تھا کہ غضنفر بلور کا پی ٹی آئی میں شمولیت کا فیصلہ انفرادی ہے، بلور خاندان کا اس فیصلے سے کوئی تعلق نہیں۔