لاہور(مانیٹرنگ ڈیسک /این این آئی) پنجاب کی قائمہ کمیٹی برائے خزانہ نے صوبائی وزرا کے لیے نئی گاڑیوں کی خریداری کے لیے سپلیمنٹری گرانٹ جاری کرنےکی منظوری دے دی۔نجی ٹی وی جیو کے مطابق پنجاب کابینہ کے وزرا کے لیے 1800 سی سی 46 نئی گاڑیوں اور وزیراعلیٰ پنجاب کے لیے ایک بلٹ پروف گاڑی کی خریداری کے لیے قائمہ کمیٹی برائےخزانہ نے 18 کروڑ 64 لاکھ روپےکی

سپلیمنٹری گرانٹ کی منظوری دی۔قبل ازیں وزیر جنگلی حیات و ماہی پروری پنجاب سید صمصام علی بخاری وسیکرٹر ی جنگلات ، جنگلی حیات و ماہی پروری پنجاب شاہدزمان کی صوبہ میں غیر قانونی شکار کی مؤثرروک تھام اور مکمل بیخ کنی کے پیش نظر ڈائریکٹر جنرل ملک ثناء اللہ خان کی زیر قیادت محکمہ تحفظ جنگلی حیات وپارکس پنجاب کی اس ضمن میں سفارشات کی روشنی میں پنجاب میں جنگلی حیات کے تحفظ کیلئے سیکرٹر ی جنگلات ، جنگلی حیات و ماہی پروری پنجاب شاہدزمان کی جانب سے مسلح فورس کے قیام کی سمری برائے حتمی منظوری وزیراعلیٰ پنجاب کو ارسال کردی گئی ہے۔ اس موقع پرمیڈیا کے نمائندگان سے بات کرتے ہوئے سیکرٹری جنگلات ، جنگلی حیات و ماہی پروری پنجاب شاہد زمان نے بتایا کہ غیرقانونی شکاری ایک بڑے مافیا کاروپ دھار چکے ہیںجن کے ساتھ آہنی ہاتھوں سے نمٹنے کیلئے ایک مسلح فورس کاقیام عمل میں لایاجارہاہے ۔ انہوں نے کہا کہ غیرقانونی شکاریوںکیخلاف حالیہ جاری کریک ڈائون کے دوران ہمارے نہتے اہلکاروں کو زدو کوب کیاگیا ، اغواکیاگیااور حتیٰ کہ ان پر گولیاں چلائی گئیں۔بدنام زمانہ غیرقانونی شکاری اب غنڈہ گردی اور بدمعاشی پر اُتر آئے ہیںلہذاان سے مقابلہ کیلئے ضروری ہے کہ جدید تقاضوں سے ہم آہنگ ایک مسلح فورس ہو جس کیلئے ہمیں جدید طرز کااسلحہ، ایمونیشن و گاڑیاں وغیرہ درکار ہیں ۔اس میں اسلحہ و ایمونیشن ہے ،80گاڑیاں ،450کے لگ بھگ موٹرسائیکلزہیں ، ڈرونز ، وائرلیس ایکوپمنٹ ، یونیفار م اور120چیک پوسٹوں کاقیام ہے ۔ انہوں نے مزید کہا کہ اگلے چھ ماہ نئی مسلح فورس کے قیام تک پوٹھوہار ریجن میں پولیس جبکہ چولستان ریجن میںایلیٹ فورس کی معاونت محکمہ کو حاصل رہے گی ۔ یاد رہے کہ ان اقدامات سے جہاں محکمہ کے افسران و اہلکاران کو مورال بلند ہوا ہے وہیں ان پر ایک گراں ذمہ داری بھی آن پڑی ہے جس کیلئے ضروری ہے کہ وہ مکمل نظم و ضبط اور پیشہ ورانہ انداز سے صوبے میں جنگلی حیات کے تحفظ و فروغ کیلئے اپنا کردار ادا کریں ۔