اسلام آباد( آن لائن) سانحہ سیالکوٹ پر علما کرام کا 10 دسمبر کو یوم جمعہ کو یوم مذمت کے طور پر منانے کا اعلان کر دیا۔علما کرام کے وفد نے اسلام آباد میں سری لنکا کے ہائی کمشنرسے ملاقات کی اورسیالکوٹ واقعہ کی مذمت کرتے ہوئے سری لنکن عوام سے اظہار یکجہتی کیا۔اسلام آباد میں علما کا وفد سری لنکن ہائی کمیشن پہنچا، جہاں انہوں نے سیالکوٹ واقعے کی مذمت

اور سری لنکن عوام سے یکجہتی کا اظہار کیا۔علماء وفد میں ڈاکٹر قبلہ ایاز، علامہ تقی عثمانی، علامہ عارف واحدی، قاری حنیف جالندھری، علامہ امین شہیدی، عبدالخبیر آزاد،ابوالخیر زبیر، حامد سعید کاظمی اور علامہ ساجد میر سمیت دیگر علما کرام نے سری لنکا کے ہائی کمشنر موہن وجے ورکرما سے اظہار یکجہتی کیا۔معروف عالم دین مفتی تقی عثمانی نے میڈیا سے گفتگومیں کہا کہ سانحہ سیالکوٹ نے تمام مکاتب فکر سمیت پوریے ملک کو ہلا کررکھ دیا ہے۔ سری لنکا برادرملک ہے۔ توقع ہے اس واقعہ سے پاکستان اورسری لنکا کے تعلقات خراب نہیں ہوں گے۔مفتی تقی عثمانی نے دیگر علمائ￿ کرام کے ہمراہ میڈیا سے گفتگو کرتے ہوئے کہا کہ سری لنکن عوام کے غم میں برابر کے شریک ہیں، سری لنکا ہمارا برادر ملک ہے، ملزمان کو سخت سے سخت سزا دلائیں گے۔سیالکوٹ سانحہ نے ہم سب کو ہلا کر رکھ دیا۔ سیاسی جماعتوں سمیت ہر مکاتب فکر کے علما نے مذمت کی ۔ ہم سری لنکن ہائی کمیشن اور حکومت سے اظہار تعزیت کرتے ہیں، حکومت سے درخواست ہے متاثرہ خاندان کو معاوضہ دے۔ انہوں نے کہا واقعہ پر دکھ ہے ملوث افراد کو سخت سزا ہوگی ۔ انہوں نے کہا ہم نے سری لنکن ہائی کمشنر سے آکر ملاقات کرکے اپنے جذبات پہنچائے ۔ یہ ایسا سانحہ ہے جس کی پورے ملک نے شدید ردعمل کا اظہار کیا ہے ۔ انہوں نے کہا سری لنکا ہمارا بھائی ملک ہے اور انکے ساتھ اظہار یک جہتی کے لئے آئے۔چیئرمین اسلامی نظریاتی کونسل ڈاکٹر قبلہ ایازکا کہنا تھا کہ سانحہ سیالکوٹ میں ملوث افراد کوسخت سے سخت سزا دی جائے گی،قاری حنیف جالندھری نے واقعہ کی مذمت کرتے ہوئے کہا علما کرام جمعہ 10دسمبر کو یوم مذمت منائیں گے۔ تمام مساجد اورامام بارگاہوں میں سانحہ سیالکوٹ کی مذمت کی جائیگی۔ علامہ طاہراشرفی نے کہا کہ پاکستان کے تمام مکاتب فکرکے جید علما کرام نے سری لنکا کے ہائی کمشنرسے تعزیت کی ہے۔ سری لنکا کویقین دلاتا ہوں کہ ہم انصاف دلائیں گے۔حامد سعید کاظمی کا کہنا تھا کہ اس سانحہ پر غمگین ہیں۔سینیٹرپروفیسرساجد میر نے سیالکوٹ سانحے کی مذمت کرتے ہوئے متاثرہ خاندان کے ساتھ اظہار ہمدردی کیا۔علامہ عارف واحدی نے کہا کہ یہ شدت پسندی پاکستان اوراسلام کے ساتھ دشمنی ہے۔ اس موقع پر سری لنکن ہائی کمشنر موہن وجے ورکرما کا میڈیا سے گفتگو میں کہنا تھا کہ پاکستان نے متعدد بار ضرورت میں ہماری مدد کی ہے۔وزیراعظم عمران خان نے ملوث افراد کو کیفرکردار تک پہنچانے کی یقین دہانی کرائی ہے۔