اسلام آباد(آن لائن ) پی ڈی ایم کے ترجمان حافظ حمداللہ نے کہا ہے کہ دھاندلی کی پیداوار حکومت کو انتخابی اصلاحات کرنے کا کوئی حق نہیں،عمران حکومت الیکشن کمیشن کے 37 آئینی و قانونی سوالات کے جوابات دیں، پی ڈی ایم عمران خان اور انکی کابینہ کو
بھاگنے نہیں دیں گے۔ پارلیمنٹ کا مشترکہ اجلاس ملتوی کرنے پر ردعمل دیتے ہوئے حافظ حمداللہ نے کہا کہ پی ڈی ایم حکومتی انتخابی اصلاحات ،ای وی ایم پہلے ہی مسترد کرچکی ہے ، ای وی ایم، آرٹی ایس سسٹم کا دوسرا نام ہے یہ آنے والا الیکشن میں دھاندلی کا منصوبہ ہے۔ حافظ حمداللہ کا کہناتھا دھاندلی کی پیداوار حکومت کو انتخابی اصلاحات کرنے کا کوئی حق نہیں۔حکومت میں اگر ہمت ہے پہلے ڈسکہ رپورٹ میں حکومتی دھاندلی کے ذمہ داران کے خلاف کاروائی تو کریں۔عمران حکومت الیکشن کمیشن کے ان 37 آئینی و قانونی سوالات کے جوابات دیں، حافظ حمداللہ کا کہناتھا آج عمران خان نے خود ہی الیکشن کمیشن کو طنزیہ تنقید کا بھی نشانہ بنایا ۔عمران خان اپنے وزراء کو انتخابی اصلاحات بل کو جہاد بل قرار دیکر ووٹ دینے کا آرڈر دے رہا ہے ۔ پارلیمانی ٹائیگر فورس مجاہدین میدان جہاد چھوڑ کر پیٹھ دکھا گئے۔ پی ڈی ایم عمران خان اور انکی کابینہ کو بھاگنے نہیں دیں گے۔ میرا مشورہ ہے کہ اگر ٹائیگر فورس جہاد نہیں کرسکتے تو دو منٹ خاموشی ہی اختیار کرلیں جیسے کہ کشمیر کو بیچتے وقت کیا ۔
