کراچی(این این آئی)متحدہ قومی موومنٹ(ایم کیو ایم)پاکستان نے سابق گورنر سندھ ڈاکٹر عشرت العباد سمیت دیگر رہنمائوں کو ایم کیو ایم میں شمولیت کی دعوت دے دی۔اس ضمن میں ایم کیوایم پاکستان کے سینئرڈپٹی کنوینرعامر خان نے ڈاکٹر عشرت العباد کی سیاست میں واپسی کو خوش آئند قرار دیتے ہوئے کہا کہ ان کی باتیں قابلِ ستائش ہیں۔ایم کیو ایم کی صورت
میں پہلے سے ایک پلیٹ فارم موجود ہے، جس کی سیاسی جدوجہد جاری ہے، کسی اور کی جگہ اس کو مضبوط کرنے کا انتخاب پہلا ہونا چاہیے۔عامر خان نے سابق گورنر سمیت دیگر رہنمائوں کو شمولیت کی دعوت دیتے ہوئے کہا کہ میں سب کو دعوت دیتا ہوں ایم کیو ایم میں شامل ہوکر اسے مضبوط کریں، ہمارے دروازے سب کے لیے کھلے ہیں، شمولیت کرنے والوں کو احترام اور عزت کے ساتھ خوش آمدید کہا جائے گا اور انہیں دل سے قبول کیا جائے گا۔انہوں نے کہاکہ سندھ کے شہری علاقوں میں ظلم و زیادتیاں اور نا انصافیاں بڑھ گئیں ہیں،2018 کے الیکشن کے نتائج کس طرح تبدیل کیے گئے کس طرح آر ٹی ایس سسٹم بیٹھا سب کے علم میں ہے، کراچی میں حلقہ بندیاں اپنی مرضی اور مفاد کے تحت کی گئیں، فیصل کنٹونمنٹ میں گلستان جوہر میں جہاں ایک وارڈ ہوتا تھا وہاں پانچ وارڈ بنا دیئے گئے۔انہوں نے کہا کہ ہمارے 90 کارکنان آج بھی لاپتہ ہے جبکہ حراست میں لیے گئے کارکنان کے مقدمات نہیں چلائے جارہے، ہمیں نہ آفس دیئے گئے اور نہ برابری کی سیاسی آزادی فراہم کی گئی،ہم پر آج بھی سختیاں برقرار ہیں، لوگوں کو ہدایت کی گئی کہ وہ ایم کیو ایم کو فنڈز نہ دیں، اس طرح کے غیر فطری عمل کے نتائج کبھی مثبت نہیں آتے، کراچی میں جو بھی کیا گیا اس کا رزلٹ سب کے سامنے ہیں۔
