اسلام آباد،لاہور (این این آئی)قومی کرکٹ ٹیم کے کھلاڑی صہیب مقصود کمر کی تکلیف کے باعث ٹی ٹوئنٹی ورلڈ کپ سے باہر ہو گئے ہیں۔پاکستان کرکٹ بورڈ (پی سی بی) کے چیف میڈیکل آفیسر ڈاکٹر نجیب اور فزیو کلف ڈیکن نے کچھ دیر قبل صہیب مقصود کی انجری کا جائزہ لیا۔

میڈیکل پینل کی جانب سے صہیب مقصود کو آرام کا مشورہ دیا گیا ہے۔پاکستان کرکٹ بورڈ کے مطابق صہیب مقصود کے متبادل کا فیصلہ جلد کردیا جائے گا۔واضح رہے کہ صہیب مقصود نیشنل ٹی ٹوئنٹی کے دوران کمر کی تکلیف کا شکار ہوگئے تھے۔دوسری جانب انٹرنیشنل کرکٹ کونسل (آئی سی سی) مینز ٹی ٹوئنٹی ورلڈ کپ کے لیے اعلان کردہ قومی اسکواڈ کو ٹریننگ کی اجازت مل گئی، قومی اسکواڈ میں شامل تمام ارکان کے ارائیول کورونا ٹیسٹ کی رپورٹ منفی آئی ہے۔قومی اسکواڈ اتوار کو نیشنل ہائی پرفارمنس سینٹر میں ٹریننگ کریگا، پیر اور منگل کو قومی اسکواڈ کے ٹریننگ سیشنز ایل سی سی گرائونڈ لاہور میں منعقد ہوں گے۔قومی اسکواڈ 14 اکتوبر کو قذافی اسٹیڈیم لاہور میں سیناریو میچ کھیلے گا، اسکواڈ میگا ایونٹ میں شرکت کیلئے 15 اکتوبر کو متحدہ عرب امارات (یو اے ای) روانہ ہو گا۔واضح رہے کہ ٹی 20 ورلڈ کپ 17 اکتوبر سے متحدہ عرب امارات اور عمان میں شروع ہو گا، پاکستان اپنا پہلا میچ روایتیحریف بھارت کیخلاف کھیلے گا۔آئی سی سی کے مطابق پاکستان اپنا دوسرا میچ 26 اکتوبر کو نیوزی لینڈ کے خلاف کھیلے گا، قومی کھلاڑی اپنے تیسرے میچ میں 29 اکتوبر کو افغانستان کے مدِمقابل ہوں گے۔ٹی ٹوئنٹی ورلڈ کپ کے سیمی فائنل 10 اور 11 نومبر کو کھیلے جائیں گے جبکہ ٹورنامنٹ کا فائنل 14 نومبر کو ہو گا۔