لاہور (آن لائن) ڈیفنس کی رہائشی ایک خاتون نے پاکستان تحریک انصاف کے رکن پنجاب اسمبلی خرم لغاری کو معاف کردیا ہے۔ جس کے بعد ملزم خرم لغاری نے مقامی عدالت سے اپنی ضمانت منظور کروالی ہے۔ واضح رہے کہ ڈیفنس کی متاثرہ خاتون نے ایم پی اے خرم لغاری کے

خلاف اس کے گھر میں داخل ہونے کی کوشش پر مقدمہ درج کروا رکھا تھا۔ مقدمہ مدعی نے ملزم کی معافی سے متعلق ایک بیان متعلقہ عدالت میں جمع کروا دیا ہے۔دوسری جانب لاہور پولیس نے ہراسگی کیسز کو بنیاد بنا کر مختلف شخصیات کے خلاف مقدمات درج کرانے والی بلیک میلر خاتون کا سراغ لگا لیا ہے پولیس کے مطابق مذکورہ خاتون اہم شخصیات کے خلاف ہراسگی کے الزامات کے تحت مقدمات درج کروا کر ان سے رقم ہتھیانے کے بعد درخواستیں واپس لے لیتی تھی یہ بھی بتایا گیا ہے کہ سراغ لگائی گئی خاتون کے خلاف پہلے سے دس مقدمات درج ہیں۔ علاوہ ازیں ایڈیشنل سیشن جج کی عدالت نے پاکستان کے سینئر سیاستدان نواب اکبر بگٹی کی بیوہ نرگس شہزادی کی جانب سے دائر کردہ درخواست عبوری ضمانت پر سماعت کرتے ہوئے۔ ملزمہ نرگس شہزادی کی عبوری ضمانت میں 20 ستمبر تک توسیع کردی ہے۔ واضح رہے کہ وفاقی تحقیقاتی ادارہ ایف آئی اے نے ملزمہ نرگس شہزادی کے خلاف مقدمہ درج کر رکھا ہے۔