اسلام آباد (این این آئی)نو منتخب ممبر قانون ساز اسمبلی کشمیر سردار تنویر الیاس نے کہا ہے کہ وزیراعظم آزاد کشمیر کیلئے نمبر ون ،نمبر ٹو کی کوئی لائن نہیں ، عمران خان کا فیصلہ من وعن قبول کرینگے ، بیرسٹر سلطان بڑے بھائی ،قابل احترام ہیں،کشمیر کو صوبہ بنانے کے پروپیگنڈہ میں کوئی حقیقت نہیں ،آزاد کشمیر پاکستان کی ریاست ہے اوررہے گی،

عمران خان کشمیرکو جتنا خودمختار کر رہے ہیں اتنا آج تک کسی نے نہیں کیا۔میڈیا سے گفتگو کرتے ہوئے نو منتخب ممبر قانون ساز اسمبلی کشمیر سردار تنویر الیاس نے کہا ہے کہ وزیراعظم آزاد کشمیر کیلئے نمبر ون ،نمبر ٹو کی کوئی لائن نہیں ،وزیراعظم آزاد کشمیر کا فیصلہ چیئرمین تحریک انصاف عمران خان کریں گے،وہ جو بھی فیصلہ کریں گے اس کو من و عن قبول کریں گے۔ انہوں نے کہا کہ پارٹی چیئرمین نے جو ٹاسک دیا اس کو پورا کریں گے۔انہوں نے کہا کہ بیرسٹر سلطان کو ہمیشہ بڑا بھائی کہا وہ قابل احترام ہیں۔انہوں نے کہا کہ آزاد کشمیر میں حکومت سازی کے معاملات ایک ہفتے تک مکمل ہو جائیں گے ،آزاد کشمیر میں حکومت سازی مکمل ہونے پر عمران خان اے جے کے اسمبلی سے خطاب کریں گے۔ انہوں نے کہا کہ کشمیر کو صوبہ بنانے کے پروپیگنڈہ میں کوئی حقیقت نہیں ،آزاد کشمیر پاکستان کی ریاست ہے اوررہیگی ،کشمیری عوام وزیراعظم عمران خان کے ہر فیصلہ پر لبیک کہیں گے کیونکہ عمران خان کشمیریوں کے سفیر ہیں اورانہوں نے یہ بن کر دکھایا ۔سردار تنویر نے کہا کہ پی ٹی آئی پورے ملک سمیت آزاد کشمیر میں متحد ہے اور رہے گی ۔ انہوں نے کہا کہ راجہ فاروق حیدر نے تیرہویں اور چودہویں ترمیم کے حوالے سے کیا کھویا کیا پایا سب کچھ سامنے لایا جائے گا ۔ انہوں نے کہا کہ عمران خان کشمیرکو جتنا خودمختار کر رہے ہیں اتنا آج تک کسی نے نہیں کیا۔