اسلام آباد (این این آئی)وفاقی وزیر اطلاعات چوہدری فواد حسین نے کہاہے کہ شہباز شریف پر 25ارب روپے جعلسازی سے پاکستان سے باہر بھیجنے کا الزام ہے ۔ اپنے بیان میں وزیراطلاعات نے کہاکہ شہبازشریف پر الزام ہے کہ انھوں نے 25ارب روپیہ جعلسازی سے پاکستان سے باہر بھیجا۔انہوں نے کہاکہ یہ رقم وہ ہے جو پتہ چل گئی اصل رقوم اس سے بہت زیادہ ہو سکتی ہیں،

ایف آئی اے کی تفتیشی ٹیم کوکسی سوال کا جواب دینے کو تیارنہیں۔وفاقی وزیر نے کہاکہ کہتے ہیں بچوں کو پتہ ہو گا بچے مفرور کرا دئیے ان کا جیل سے باہر ہونا مذاق نہیں تو کیا ہے؟ دوسری جانب وزیرِاعظم عمران خان کی ہدایت پر وفاقی وزراء سے اضافی سیکیورٹی واپس لینے کا عمل شروع ہو گیا، ذرائع کے مطابق متعدد وفاقی وزراء سے اضافی سیکیورٹی واپس لے لی گئی۔ذرائع نے بتایا کہ کابینہ ڈویژن اور اسلام آباد پولیس نے وزراء سے اضافی سیکیورٹی واپس لی ہے، اب تک اسپیکر اور ڈپٹی اسپیکر قومی اسمبلی سمیت 7 وفاقی وزراء سے اضافی سکیورٹی واپس لی گئی ہے۔آئی جی اسلام آباد کی وزیرِاعظم عمران خان سے ملاقات کے بعد وفاقی وزراء کی سیکیورٹی پر تعینات اضافی نفری واپس منگوا لی گئی ہے، وزراء کے پاس اسلام آباد پولیس کے صرف 2، 2 اہلکار سیکیورٹی پر مامور رہیں گے۔ایک وزیر کے پاس سیکیورٹی پر مامور 5 اہلکاروں میں سے 3 کو واپس بلا لیا گیا ، متعدد وفاقی وزراء کے ساتھ اسلام آباد پولیس کے 2 اہلکار ڈیوٹی دیں گے۔ذرائع نے بتایا کہ چیئرمین سینیٹ کو دی گئی نفری برقرار رہے گی، قومی اسمبلی کے اسپیکر اور ڈپٹی اسپیکر کو دی گئی اضافی نفری میں بھی کمی کر دی گئی ہے۔ذرائع نے بتایا کہ شیریں مزاری اور پرویز خٹک سمیت متعدد وزراء سے اضافی سیکیورٹی واپس لی گئی ہے۔واضح رہے کہ وزیرِ اعظم عمران خان نے گزشتہ کابینہ کے اجلاس میں پروٹوکول کم کرنے کا فیصلہ کیا تھا۔

موضوعات:چوہدری فواد حسین