لاہور( این این آئی )رواں مالی سال کے گیارہ ماہ کے دوران 9علاقائی ممالک کے لئے پاکستانی برآمدات میں 6 فیصداضافہ ہوا۔اسٹیٹ بینک آف پاکستان کے مطابق سب سے زیادہ برآمدات چین کے لئے ہوئیں جن میں 19فیصدسے زیادہ اضافہ ہوا اوران کاحجم ایک ارب 83کروڑڈالرتک پہنچ گیا۔بینک نے کہاہے کہ کروناکے بعد
کے عرصہ میں خاص طورپربرآمدات میں اضافہ ہواہے۔چیئرمین سینیٹ محمد صادق سنجرانی سے چیئر مین قومی احتساب بیوروجسٹس (ر) جاوید اقبال نے پارلیمنٹ ہاؤس میں ملاقات کی اورچیئرمین سینیٹ کو نیب کی سالانہ رپورٹ برائے 2020 پیش کی۔ جسٹس (ر) جاوید اقبال نے ایوان بالاء کے چیئرمین کوملک میں جاری احتسابی عمل کے متعلق تفصیلی آگاہ کرتے ہوئے بتایا کہ ملک میں احتسابی عمل کو زیادہ شفاف اور موثر بنانے کیلئے اقدامات اٹھائے جا رہے ہیں تاکہ احتساب کا غیر جانبدارانہ نظام قائم کیا جا سکے۔ چیئرمین سینیٹ صادق سنجرانی نے کہا کہ احتساب کے عمل میں شفافیت اور غیر جانبدرای کو ہر صورت برقرار رکھا جائے اور اس بات کو یقینی بنایا جائے کہ احتسابی عمل کی آڑ میں تاجر وں اور سرمایہ کاروں کے ہراساں ہونے کے تاثر کو نفی کیا جائے۔ کرپشن کے خاتمے سے تاجر برادری کو بہتر ماحول میسر ہوگاجس سے ملک میں تجارت اور سرمایہ کاری کو فروغ میسر ہوگا۔ چیئرمین نیب نے چیئرمین سینیٹ کو آگاہ کیا کہ ارکین پارلیمنٹ، متعلقہ اسٹیک ہولڈرز اور کاروباری طبقے کی جانب سے مثبت تجاویز کا خیر مقدم کیا جائے گا۔ انہوں نے کہا کہ احتسابی عمل سے کسی کو خوفزدہ ہونے کی ضرورت نہیں ہے۔قومی احتساب بیورو کا ایجنڈا صرف پاکستان کی ترقی و خوشحالی کیلئے سازگار اورکرپشن سے پاک ماحول فراہم کرنا ہے۔
