اسلام آباد(آن لائن) وفاقی وزیر خزانہ شوکت ترین نے کہا ہے کہ آئی ایم ایف کی ایماء پر بجلی کی قیمتوں اور انکم ٹیکس ٹـیرف میں اضافہ نہیں کریں گے ۔ امریکہ سے امداد اور قرضہ نہیں بلکہ تجارت کے خواہاں ہیں آنے والے بجٹ میں تنخواہ دار طبقے سمیت دیگر شعبوں کی بہتری کے لئے اقدامات کئے گئے ہیں ۔ ترسیلات زر میں اضافے
اور برآمدی شعبے کی بہتری کی وجہ سے ذخائر میں اضافہ ہوا ہے ۔ مہنگائی میں کمی کے لئے ضلعی سطح پر اقدامات سمیت درآمدی اجناس کی کاشت میں اضافہ کریں گے ۔ اقتصادی راہداری کے تحت قائم کئے جانے والے اقتصادی زونز میں بیرونی سرمایہ لائیں گے اگلے سال کے دوران نوجوانوں کو 20 لاکھ سے زائد نوکریاں فراہم کریں گے ۔ا ن خیالات کا اظہار انہوں نے قومی اقتصادی سروے رپورٹ پیش کرنے کے موقع پر کیا ۔ انہوں نے کہا کہ حکومت ملکی معیشت کی بہتری کے لئے مینو فکچرنگ ، ٹیکسٹائل ، زراعت سمیت دیگر شعبوں میں مراعات دیں ۔ زراعت کے شعبے میں 2.7 فیصد بہتری آئی ہے اور کپاس کی فصل خراب ہونے کے باوجود دیگر فصلوں میں بہتری آئی ہے ۔ انہوں نے کہا کہ بیرون ممالک سے ترسیلات میں ریکارڈ اضافہ ہوا ہے اور اس وقت 26 بلین ارب ڈالر سے تجاوز کر چکی ہیں اور اندازہ ہے کہ 29 ارب ڈالر تک بڑھ جائیں گے۔ انہوں نے کہا کہ گندم اور چینی کی درآمد کی وجہ سے درآمدات میں اضافہ ہوا تاہم برآمدات میں بھی خاطر خواہ اضافہ ہوا ہے ۔انہوں نے کہا کہ مہنگائی کو کنٹرول کرنے کی کوشش کر رہے ہیں اس لئے زرعی مصنوعات میں اضافہ کریں گے انہوں نے کہا کہ ملک میں پرائس کنٹرول کے نظام کو بھی بہتر کرنا پڑے گا ۔ انہوں نے کہا کہ کوویڈ کی وجہ سے پوری دنیا میں
بحران آیا ہے تاہم بیرون ممالک کی ترسیلات ملک کی معیشت کو بہتر کرنے میں مدد ملی ہے ۔ انہوں نے کہا کہ اس وقت اسٹیٹ بنک کے ذخائر 16 ارب ڈالر تک پہنچ چکے ہیں انہوں نے کہاکہ ایف اے ٹی ایف کے گرے لسٹ سے بھی جلد نکل جائیں گے ۔انہوں نے کہا کہ ایف بی آر کی ٹیکس وصولی بھی بڑھ چکی ہے اور گزشتہ سال سے 18
فیصد زیادہ محصولات وصول ہونے میں گزشتہ چار مہینوں سے محصولات میں بہت بہتری آئی ہے اور امید ہے کہ مالی سال کے اختتام تک اپنا ٹارگٹ پورا کر لیں گے ۔انہوں نے کہا کہ ملک میں مہنگائی کی شرح میں اضافہ ہوا ہے اس کی بڑی وجہ گندم ، چینی ، گھی ، دالوں کی برآمد کی وجہ سے ہے انہوں نے کہاکہ بین الاقوامی سطح پر قیمتوں
میں اضافے کی وجہ سے بھی مہنگائی میں اضافہ ہوا ہے ۔ گزشتہ 12 مہینوں میں چین کی بین الاقوامی قیمتیں 58 فیصد بڑھی جبکہ ہم نے صرف 38 فیصد قمتیں بڑھائیں ہیں ۔احساس پروگرام بہترین اور بڑا پروگرام ہے اور ملک میں 15 ملین خاندانوں کو مالی معاونت سمیت دیگر سہولیات فراہم کی ہیں انہوں نے کہا کہ بلین ٹری سونامی ،
کامیاب جوانا پروگرام حکومت کے بہترین پروگرام ہیں ۔ تینوں ریٹنگ ایجنسیوں نے پاکستان کی ریٹنگ بہتری کی ہے ۔انہوں نے کہا کہ معاشی ترقی کو 7 فیصد تک پہچانا ہمارا اولین مقصد ہے اور 20 لاکھ سے زائد نوجوانوں کو نوکریاں دیں گے ۔انہوں نے کہا کہ حالیہ بجٹ میں معاشی بہتری کے لئے اقدامات کئے ہیں اور چھوٹے اور درمیانے درجے کے تاجروں کو زیادہ سے زیادہ قرضے اور مراعات دیں گے تاکہ وہ اپنے کاروبار کو بہتر کر سکیں ۔
