اسلام آباد (این این آئی)وزیر اعظم عمران خان کے مشیر برائے احتساب و داخلہ شہزاد اکبر نے کہاہے کہ برطانیہ ایگزیکٹیو آرڈر سے نواز شریف کو ڈی پورٹ کر سکتا ہے، برطانیہ نے ہمیں نواز شریف کی حوالگی کی درخواست دینے کا کہا ہے۔ و ہ منگل کو اسلام آباد ہائی کورٹ جرنلسٹ ایسوسی ایشن کے

وفد سے گفتگو کررہے تھے اس موقع پر ان کے ہمراہ وفاقی وزیرِاطلاعات و نشریات فواد چوہدری اور وزیرِ مملکت برائے اطلاعات فرخ حبیب بھی موجود تھے۔شہزاد اکبر نے کہا کہ برطانیہ کا قانون ہے کہ سزا یافتہ شخص کو وزٹ ویزا نہیں دیا جا سکتا، برطانیہ کو بتایا ہے کہ نواز شریف سزا یافتہ ہیں۔انہوں نے کہا کہ یہ بھی برطانیہ کو بتایا ہے کہ نواز شریف بیماری کا علاج کرانے برطانیہ گئے تھے، ہماری اطلاعات کے مطابق نواز شریف نے انگلینڈ میں ایک ٹیکا بھی نہیں لگوایا۔شہزاد اکبر نے کہا کہ برطانیہ سے کہا ہے کہ معاملہ خود دیکھ کر قانون کے مطابق فیصلہ کریں، ہم نے کہا ہے کہ آپ پہلے یہ دیکھیں برطانوی قانون نواز شریف کو وزٹ ویزے پر قیام کی اجازت دیتا ہے یا نہیں؟۔انہوں نے کہا کہ اگر سزا یافتہ شخص کو برطانیہ کا وزٹ ویزا نہیں مل سکتا تو اس میں توسیع بھی نہیں ہو سکتی، حوالگی کی درخواست طویل عمل ہے جس میں 5 سال بھی لگ سکتے ہیں، اسے بعد میں دیکھیں گے۔