اسلام آباد( آن لائن ) وفاقی وزیر تعلیم شفقت محمود بھی کورونا کا شکار ہو گئے۔ سماجی رابطوں کی ویب سائٹ پر ٹویٹ کرتے ہوئے وزیر تعلیم نے خود میں کورونا وائرس کی موجودگی کی تصدیق کرتے ہوئے بتایا کہ ان کا کورونا ٹیسٹ مثبت آگیا ہے میں ٹھیک ہو ں معمولی علامات ہیں انشاء اللہ جلد صحتیاب ہو جائوں گا،اس سے قبل وزیر اعظم عمران خان سمیت مختلف

وزرا اور اراکین اسمبلی کورونا سے متاثر ہو چکے ہیں جبکہ پاکستان میں اب کورونا وائرس کے پھیلاؤ کی صورتحال انتہائی کم ہو چکی ہے۔پاکستان میں کورونا کی صورتحال کم ہونے کے بعد مختلف اضلاع میں تعلیمی ادارے کھل گئے ہیں۔دوسری جانب وفاقی وزیر برائے منصوبہ بندی ترقی واصلاحات وخصوصی اقدامات اسدعمر نے کہا ہے کہ ‏کل پہلی دفعہ ایک دن میں اڑھائی لاکھ سے زائد افراد کی ویکسی نیشن کی گئ۔ اپنے ٹویٹ میں کہا ہےکہ کل 267،953 لوگوں کو ویکسین لگائ گئ۔تمام رجسٹرڈ لوگوں سے درخواست ہے کے جلد اپنی ویکسی نیشن کے لئے ویکسین سینٹر جائیں۔ جن افرادکو ویکسین کی دوسری خوراک لگنی ہے وہ ضرور بروقت ویکسی نیشن کے لئے جائیں۔واضح رہے کہ ملک بھر میں 24 گھنٹوں کے دوران کورونا وائرس کے 2253 کیس، 92 اموات رپورٹ،سب سے زیادہ اموات پنجاب میں ریکارڈ، ایکٹو کیسز کی تعداد 62 ہزار 295 ہو گئی ہے ۔