اسلام آباد، بیجنگ (این این آئی)وزیراعظم عمران خان کل جمعہ کو 1100 میگا واٹ کا Kـ2 ایٹمی بجلی گھر کا افتتاح کریں گے۔ ذرازئع کے مطابق افتتاح کے بعد 1100 میگاواٹ بجلی نیشنل گرڈ میں شامل ہو جائے گی ،اس سے قبل Kـ1 ایٹمی بجلی گھر 1960 کی دہائی میں لگا تھا ، 60 سال کے بعد ایک نیا پلانٹ لگا یا گیا ہے ،
چین کی مدد سے لگنے والا یہ پلانٹ Gـ3 ٹیکنالوجی پر مشتمل ہوگا ،جی تھری ٹیکنالوجی اس وقت دنیا کی جدید ٹیکنالوجی ہے، پاکستان چین کی دوستی کی 70 سالہ سالگرہ کے موقع پر یہ پلانٹ بجلی کی ترسیل شروع کرے گا ، پاکستان اور چائینہ کے درمیان ایٹمی تعاون کا یہ تیسواں سال ہے۔دریں اثنا وزیراعظم عمران خان نے کہا ہے کہ پاک چین تعلقات کو ”آل ویدر اسٹریٹجک کوآپریٹو پارٹنرشپ” میں تبدیل کردیا گیا ہے۔وزیراعظم عمران خان نے چینی ہم منصب لی کی کیانگ سے ٹیلی فونک رابطہ کرکے پاک چین سفارتی تعلقات کی 70 ویں سالگرہ اورکورونا ویکسین کے تعاون پرتبادلہ خیال کیا، وزیر اعظم عمران خان نے مریخ پر چینی خلائی جہاز کی کامیاب لینڈنگ پرمبارکباد پیش کی۔وزیراعظم عمران خان نے کہا کہ پاکستان اور چین نے اپنے تعلقات کو ”آل ویدر اسٹریٹجک کوآپریٹو پارٹنرشپ” میں تبدیل کردیا، چین پاکستان اقتصادی راہداری (سی پیک) نے معاشی سرگرمی، روزگار پیدا کیا،اس سے دوطرفہ اور علاقائی تجارت میں
مزید اضافہ ہوگا۔۔وزیر اعظم نے کورونا ویکسین کی فراہمی اور پاکستان میں ویکسین تیار کرنے کی سہولت دینے پر چین کا شکریہ ادا کیا اور اسٹریٹجک تعاون مضبوط کرنے کے لئے اعلی سطح کے تبادلے کی ضرورت پرزور دیا۔ دونوں رہنماؤں نے پاک چین دوطرفہ تعلقات کو مزید مستحکم کرنے کے عزم کی تصدیق کی۔وزیر اعظم نے پاکستان اور چین کے مابین سفارتی تعلقات کے قیام کی 70ویں سالگرہ کے حوالے سے چینی وزیر اعظم کو مبارکباد پیش کی جسے دونوں فریق مناسب انداز میں منائیں گے۔
