لاہور (آئی این پی )پیپلز پارٹی کے صدارتی امیدوار اعتزاز احسن نے کہا ہے کہ مولانا فضل الرحمن کو ہم نے ایلچی بنایا وہ خود امیدوار بن گئے ۔ جمعہ کو ایک نجی ٹی وی چینل کے پروگرام میں اظہار خیال کرتے ہوئے اعتزاز احسن نے کہا کہ مولانا کی صدارتی امیدوار بننے کی چال ان کے سیاسی کیرئیر پر داغ ہے۔

انہوں نے کہاکہ مولانا فضل الرحمن نے ہمیں کہا کہ صرف وہی نوازشریف کو راضی کرسکتے ہیں ،دوسری طرف ن لیگ سے کہا کہ وہ زرداری صاحب کو مناسکتے ہیں۔اعتزازاحسن نے کہا کہ ہم نے مولانا کی باتوں پر یقین کیا اور انہیں ایلچی بنادیا لیکن وہ خود صدارتی امیدوار بن گئے ہیں۔دریں اثناء پشتونخوا ملی عوامی پارٹی کے سربراہ محمود خان اچکزئی نے کہا ہے کہ عمران خان وزیراعظم ہیں اور مولانا فضل الرحمان صدر ہوں تو یہ اصل تبدیلی ہو گی۔ جمعہ کومولانا فضل الرحمان کے ہمراہ بات کرتے ہوئے محمود خان اچکزئی کا کہنا تھا کہ کتنا مزہ آئے گا کہ عمران خان وزیراعظم ہوں گے اور فضل الرحمان صدر ہوں، یہ اصل تبدیلی ہوگی۔ان کا مزید کہنا تھا کہ یہ بہترین تبدیلی ہو گی، توازن بھی رہے گا اور تبدیلی بھی آ جائے گی۔انہوں نے کہا کہ دونوں ایک چپوترے پر کھڑے ہو کر پاکستان کے لیے سلامی لے رہے ہوں تو کتنا اچھا ہو گا۔محمود خان اچکزئی نے کہا کہ پشتو میں کہاوت ہے کہ گرم اور ٹھنڈی تاریں آپس میں ملتی ہیں تو بجلی روشنی دیتی ہے، انہوں نے عمران خان اور مولانا فضل الرحمان کا نام لیے بغیر کہا کہ گرم تار میرا یار، ٹھنڈا تار میرا یار، ان دونوں کو لگا دیجیے پاکستان روشن ہو جائے گا۔محمود خان اچکزئی کے ان جملوں سے ساتھ بیٹھے مولانا فضل الرحمان بھی مسکراتے رہے۔خیال رہے کہ 5 ستمبر کو ملک میں صدارتی الیکشن ہونے جارہے ہیں اور اس میں مولانا فضل الرحمان مسلم لیگ ن اور دیگر اپوزیشن جماعتوں کے صدارتی امیدوار ہیں۔