مظفر گڑھ (مانیٹرنگ ڈیسک) پورے ملک میں عام انتخابات سر پر آن پہنچے ہیں اور تمام جماعتوں کے امیدوار اپنے اپنے حلقوں میں ووٹروں سے نئے وعدے کرتے ہوئے نظر آ رہے ہیں لیکن حلقہ این اے 184 میں تحریک انصاف کی خاتون امیدوار نے تو انوکھا کام کر دیا ہے اپنی تصویر کی بجائے اپنے شوہر کی تصویر اشتہارات میں لگا دی ہے اور حلقے کا چکر تک نہیں لگایا۔
مظفر گڑھ کے قومی اسمبلی کے حلقہ این اے 184 سے تحریک انصاف کی امیدوار بیگم سیدہ زہرہ نے انتخابی مہم کے لیے تیار کیے گئے بینر پر اپنی تصویر کی جگہ اپنے شوہر کی تصویر لگا دی ہے اور اوپر اپنا نام لکھ دیا ہے۔ ایک نجی ٹی وی چینل کی رپورٹ کے مطابق تحریک انصاف کی امیدوار زہرہ باسط حلقے سے ہی غائب ہیں اور وہ اپنے حلقے این اے 184 میں ووٹ مانگنے کے لیے بھی نہیں آئیں۔
