لاہور(سی پی پی) احتساب بیورو (نیب ) لاہور نے کرپشن کیسز میں ملوث مزید چار ملزمان کو گرفتار کر لیا ،اسٹیٹ لائف انشورنس کوآپریٹو ہاؤسنگ سوسائٹی میں مبینہ کروڑوں کی کرپشن کے الزام میں دو ملزمان کو گرفتار کیا گیا ۔ نیب ترجمان کے مطابق نیب نے اسٹیٹ لائف انشورنس کوآپریٹو ہاؤسنگ سوسائٹی کیلئے 5000 کنال زمین کی خریدوفروخت میں مبینہ کروڑوں کی کرپشن میں ملوث محمد آصف اور محمد اشرف کو گرفتارکیا۔ مذکورہ کیس
میں پٹواری عابد حسین کو پہلے ہی گرفتار کیا جا چکا ہے ۔دوسری کارروائی ایم این ایم موٹر سائیکلز کرپشن کیس میں ملوث ملزمان محمد ساغر نثار اور نوید اظہر کی گرفتاری کی صورت میں کی گئی ۔دونوں ملزمان مبینہ طور پر سینکڑوں متاثرین کو موٹر سائیکلز فراہمی کے نام پر کروڑوں روپے سے محروم کرنے میں ملوث ہیں۔نیب لاہور مذکورہ کیس میں مجموعی طور پر 30 ملزمان کو گرفتار کر چکا ہے جن سے تحقیقات جاری ہیں۔
