لاس اینجلس(این این آئی)گزشتہ ماہ 27 نومبر کو برطانوی شہزادے ہیری سے منگنی کرنے والی امریکی اداکارہ میگھن مارکل کو محبت کی قیمت چکانی پڑی اورانہیں ممکنہ طور پر فلم کے کردار سے ہاتھ دھونا پڑیں گے۔میڈیارپورٹ کے مطابق میگھن مارکل اب تک محض 10 سے بھی کم فلموں میں جلوہ گر ہوچکی ہیں جبکہ وہ 2 درجن کے قریب ٹی وی ڈراموں اور سیریلز میں اداکاری کرچکی ہیں۔ان کی آخری فلم
’اینٹی سوشل‘ 2015 میں ریلیز ہوئی تھی تاہم انہیں کیریئرکو آگے بڑھانے کیلئے اہم فلم میں مرکزی کردار کیلئے شارٹ لسٹڈ کیا گیا تھا مگر منگنی ہوتے ہی فلم سازوں کے ارادے بدل گئے، اور اب انہیں یہ کردار نہ دیے جانے کی باتیں کی جا رہی ہیں۔برطانوی اخبار ’دی سن‘ نے ذرائع سے بتایا کہ میگھن مارکل کو معروف جاسوس فلم ’جیمز بانڈ‘ کی آنے والی فلم میں مرکزی اداکار ڈینئل کریگ کی ہیروئن کے طور پر کاسٹ کیے جانے کیلئے شارٹ لسٹ کیا گیا تھا۔خبر کے مطابق میگھن مارکل کو اس کردار کے لیے اس وقت شارٹ لسٹ کیا گیا تھا ٗجب تک ان کی منگنی نہیں ہوئی تھی۔اخبار کے مطابق میگھن مارکل کی شہزادے ہیری سے منگنی ہونے کے بعد فلم کے قریبی حلقوں کا خیال ہے کہ اب یہ کردار کسی اور کو دیا جائیگا۔‘جیمز بانڈ‘ فلم سے جڑے قریبی ذرائع کہتے ہیں کہ اب فلم سازوں کو میگھن مارکل پر اعتبار نہیں رہا ٗوہ سمجھتے ہیں کہ اداکارہ شہزادے سے پیار کے باعث درست طرح سے کردار ادا نہیں کر پائیں گی ٗاب خیال کیا جا رہا ہے کہ فلم ساز جیمز بانڈ کے ہیرو کے لیے کسی نئی اداکارہ کو چانس دیں گے ٗتوقع کی جا رہی ہے فلم ساز فلم کے لیے امریکا یا کینیڈا کی کسی نئی اداکارہ کو کاسٹ کریں گے۔خیال رہے کہ 36 سالہ میگھن مارکل کی 34 سالہ شہزادہ ہیری سے مارچ 2018 میں شادی طے ہے ٗجبکہ جیمز بانڈ کی آنے والی فلم کو 2019 میں ریلیز کیا جائے گا۔شادی کے بعد میگھن مارکل کی جانب سے فلمی کیریئر
جاری رکھنے یا نہ رکھنے سے متعلق تاحال کوئی حتمی اطلاعات نہیں تاہم امکان ہے کہ وہ فلمی دنیا کو خیرآباد کہ دیں گی۔جیمز بانڈ سیریز کی 25 ویں فلم 4 سال کے وقفے کے بعد 2019 میں ریلیز ہوگی، جیمز بانڈ کی 24 ویں فلم ’اسپیکٹر‘ 2015 میں ریلیز کی گئی تھی جبکہ اس سے پہلے 2012 میں اسی سیریز کی 23 ویں فلم ’اسکائی فال‘ ریلیز کی گئی تھی۔
