ممبئی(نیوز ڈیسک) بالی ووڈ میں منا بھائی کے نام سے مشہور اداکار سنجے دت جیل سے رہائی کے بعد جلد ہی ایکشن میں نظرآئیں گے۔بالی ووڈ اداکار سنجے دت فلم نگری میں منا بھائی کے نام سے بھی پہچانے جاتے ہیں اور ان کا شمار انڈسٹری کے نامور اداکاروں میں ہوتا ہے یہی وجہ ہے کہ ان کی فلموں کو بے حد پسند بھی کیا جاتا ہے جب کہ سنجو بابا گزشتہ دنوں ساڑھے 3 برس قید کی سزا پوری کرکے پونے کی یارواڈا جیل سے رہا ہوچکے ہیں جس کے بعد وہ جلد ہی ایکشن میں نظر آئیں گے۔میڈیا رپورٹس کے مطابق بالی ووڈ اداکار سنجے دت کی جیل میں قید کے باعث 7 فلموں کی شوٹنگ تاخیر کا شکارتھی جس کی وجہ سے فلم نگری کے پروڈیوسر کے 350 کروڑ روپے داؤ پر لگے ہوئے تھے تاہم اب سنجو باباکی جیل سے رہائی کے بعد جلدہی کئی فلموں میں شوٹنگ شروع ہونے کا امکان ہے جب کہ اداکار چند دن فیملی کے ساتھ گزاریں گے جس کے بعد وہ جلد ہی ہدایتکار سدھارتھ آنند کی ایکشن فلم میں اداکاری کرتے نظر آئیں گے۔واضح رہے کہ اداکار سنجے دت 1993 میں ممبئی حملوں اور غیر قانونی اسلحہ رکھنے کے جرم میں ساڑھے 3 سال قید کاٹی ہے۔