ممبئی(نیوز ڈیسک) بولی وڈ کے دبنگ اداکار سلمان جو ناصرف بچوں کے لیے فلاحی کاموں میں بڑھ چڑھ کر حصہ لیتے ہیں، بلکہ اپنی فلموں میں نئے اداکاروں کو موقع دینے کے حوالے سے بھی بڑے سخی مانے جاتے ہیں، اب اپنی اگلی فلم کے لیے دریا دلی کی ایک اور مثال قائم کردی۔ٹائمز آف انڈیا کی رپورٹ کے مطابق سلمان خان نے اس بار بڑے دل کا ثبوت دیتے ہوئے اپنے ذاتی محافظ شیرا کے بیٹے ٹائیگر کو اپنی اگلی فلم ’سلطان‘ کے کریو میں شامل کرلیا ہے۔رپورٹ میں کہا گیا ہے کہ سلمان خان شیرا کو بہت پسند کرتے ہیں اور انہوں نے اپنی 2011 میں آنے والی فلم ’باڈی گارڈ‘ کی پروموشن کے لیے بھی شیرا کو پیش پیش رکھا تھا۔اس وقت سلمان نے شیرا کی کارکردگی سے خوش ہوکر ان کے بیٹے کو فلم میں جگہ دینے کا وعدہ کیا تھا، اور اب اپنے وعدے کا پاس رکھتے ہوئے انہوں نے ٹائیگر کو اپنی اگلی فلم ’سلطان‘ کے کریو میں بطور اسسٹنٹ شامل کرلیا ہے۔