ممبئی (نیوزڈیسک)بالی ووڈ اداکارہ پریانکا چوپڑا نے کہا ہے کہ انہیں بالی ووڈ میں اپنے کیرئیر کے آغاز کے دوران اپنی رنگت کی وجہ سے بہت تنقید اور سخت جملے برداشت کرنا پڑے تھے۔ غیر ملکی ٹی وی کو انٹرویو دیتے ہوئے بالی ووڈ اداکارہ پریانکا چوپڑا نے کہا کہ انہیں بالی ووڈ انڈسٹری میں جگہ آسانی سے نہیں ملی ہے، ابتدائی دنوں میں انہیں کئی باراپنی رنگت کی وجہ سے سخت تنقید برداشت کرنا پڑی تھی، بہت سے افراد کا کہنا تھا کہ اپنی کالی رنگت کی وجہ سے فلموں میں چل ہی نہیں پاو گی، انہیں خود اپنی اداکاری اورہنرکو سمجھنے میں بہت سال لگے، دنیا میں کوئی انسان مکمل نہیں لیکن اپنی کمزوریوں کو پہچانتے ہوئے اعتماد سے خود کو پیش کرنے سے آپ کو کچھ بھی حاصل کرسکتے ہیں۔ وہ اپنے رنگ اور آواز کو تو بدل نہیں سکتیں لیکن انہوں نے اپنے کام پر بے تحاشا محنت کی، انہیں اپنے ہنر کو سمجھنے میں 7 سے 8 سال لگے لیکن انہوں نے ہمیشہ اپنے طریقے سے کام کیا اور کبھی کسی کے لیے خود کو تبدیل نہیں کیا۔ پریانکا چوپڑا نے کہا کہ باجی راو مستانی میں اداکاری پر ان کی کافی تعریف ہوئی ہے، لیکن انہوں نے خود ابھی تک یہ فلم نہیں دیکھی لیکن جلد ہی وہ اپنی یہ فلم دیکھیں گی کیونکہ فلم میں ان کی اداکاری کی تعریف امیتابھ بچن نے انھیں خط لکھ کر کی ہے۔