واشنگٹن (مانیٹرنگ ڈیسک) امریکی کمپنی ’ایپل‘ نے حریف کمپنیوں گوگل اور ایمازون کے سمارٹ اسپیکر کے ٹکر کے سپیکر متعارف کرادیئے ہیں جو 4 کروڑ 50 لاکھ سے زائد گانوں کی لائبریری سے منسلک ہیں۔غیر ملکی میڈیا رپورٹ کے مطابق ایپل نے ’ہوم پاڈ‘ سمارٹ سپیکرز کو فوری طور پر متعارف کراتے ہوئے انہیں امریکا، برطانیہ اور آسٹریلیا میں آن لائن فروخت کیلئے پیش کردیا ہے ۔
کمپنی نے اعلان کیا ہے کہ ان سپیکرز کو آئندہ ماہ 9 فروری کو ایپل اسٹورز کی زینت بھی بنایا جائے گا۔ایپل کے ان سمارٹ اسپیکرز کی خاص بات یہ ہے کہ انہیں ماحول دوست ٹیکنالوجی سے تیار کیا گیا ہے، جو کسی بھی گھر یا دفتر کے ماحول کو محسوس کرتے ہوئے خود کو ڈھال لیتے ہیں۔سپیکرز کو کمرے کی کسی بھی جگہ رکھا جائے تو یہ اسپیکرز کمرے کے ماحول کے مطابق اپنی ٹیون کو تبدیل کرتے ہیں۔’ہوم پاڈ‘ اسپیکرز ایپل کے ایک اور اسمارٹ آلے سری سے منسلک ہونے کے ساتھ یہ ’ایپل میوزک‘ اور ’ایئر پلے 2‘ جیسی میوزک لائبریری سے بھی انٹرنیٹ کے ذریعے منسلک ہونگے،صارفین ان کے ذریعے دنیا کے ہزاروں گلوکاروں کے 4 کروڑ 50 لاکھ سے زائد گانوں تک رسائی حاصل کرسکیں گے۔کمپنی کا دعویٰ ہے کہ ’ہوم پاڈ‘ کم سے کم بجلی خرچ کرنے سمیت انتہائی کم وولٹیج پر بھی چلتے ہیں جبکہ ان میں نصب آئی فون 6‘ کی چِپِ ’اے8‘ انہیں ایکسٹرا اسمارٹ بھی بناتی ہے۔’اے 8‘ چپ کی وجہ سے یہ سپیکر گھر میں موجود تمام الیکٹرانک سمارٹ آلا ت سے بھی منسلک ہوسکتے ہیں جبکہ اسی چپ کے باعث ان سپیکرز سے گرد و نواح کے حالات سے بھی باخبر رہا جاسکتا ہے۔ان سب چیزوں سے بڑھ کر یہ کہ ان اسپیکرز کو ٹچ کیے بغیر صرف احکامات دیتے ہوئے بھی چلایا جاسکتا ہے، یعنی اگر اسپیکر دور رکھیں ہوں تو صارف انہیں زبانی حکم دے سکتا ہے کہ فلاں گانا چلالو۔انتہائی ایڈوانس ٹیکنالوجی کے حامل ان سپیکرز کا ڈیزائن بھی اچھوتا بنایا گیا ہے جبکہ ان کی قیمت 349 امریکی ڈالرز رکھی گئی ہے۔
