نیویارک (مانیٹرنگ ڈیسک) عالمی شہرت یافتہ امریکی کمپنی ایپل کو اپنے آئی فون سست کرنے کے اعتراف کے بعد دنیا بھر میں تنقید کا سامنا ہے تاہم ایپل نے صارفین سے معذرت کے بعد انتہائی شاندار پیش کر دی۔ رپورٹس کے مطابق ایپل نے آئی فون سکس اور اس کے بعد آنے والے ماڈلز کی بیٹریوں پر خصوصی رعایت دینے کا اعلان کیا ہے۔ کمپنی کے مطابق دنیا بھر کے ایسے صارفین جن کے پاس آئی فون سکس یا اس کے بعد کے آئی فون ہیں اور

ان کی رفتار سست ہے تو وہ کمپنی کی جانب سے اعلان کردہ خصوصی رعایت سے فائدہ حاصل کرسکتے ہیں۔جس کے بعد پاکستان سمیت دنیا بھر کے صارفین اپنے پرانے آئی فون کی بیٹری پاکستانی 8 ہزار روپے سے زائد کے بجائے اب محض 3 ہزار روپے میں حاصل کر سکیں گے۔ کمپنی نے واضح کیا ہے کہ اس خصوصی رعایت سے وہ صارفین ہی فائدہ حاصل کرسکیں گے، جو کمپنی کے مطلوبہ کرائیٹیریا (معیار) پر پورا اتریں گے۔صارفین کو اپنے آئی فون کے سیریل نمبر سمیت دیگر معلومات فراہم کرنا ہوگی، جس کے بعد کمپنی پہلے یہ تصدیق کرے گی کہ شکایت کرنے والے صارف کا آئی فون سست ہے یا نہیں۔ کمپنی کے مطابق صارفین بیٹری تبدیل کروانے کے لیے آن لائن رابطہ کرسکتے ہیں۔سست آ فون صارفین ایپل سے آن لائن سپورٹ چیٹ, ایمیلاور ٹوئٹر سمیت ایپل سپورٹ ایپ کے ذریعے رابطہ کرسکتے ہیں۔اس کے علاوہ سست آئی فون کی شکایت والے صارفین ایپل کے سروس پرووائیڈر سینٹرز سے بھی خصوصی رعایت حاصل کرسکیں گے۔ واضح رہے کہ ایپل نے اعتراف کیا تھا کہ کمپنی نے 2016 میں ایک سافٹ ویئر فیچر متعارف کرایا تھا جو کہ پرانے آئی فونز کو سست کردیتا ہے، جس کی وجہ لیتھم اون بیٹری کی عمر بڑھنے سے ڈیوائس کو پیش آنے والے مسائل سے بچانا ہے۔بعد ازاں ایپل نے صارفین سے آئی فون کو سست کرنے پر معذرت بھی کی تھی، لیکن دنیا بھر سے لوگوں نے کمپنی کو شدید تنقید کا نشانہ بنایا تھا۔